Самарқанд вилоятида хориждан Ўзбекистонга 20 килограммдан ортиқ гиёҳвандлик моддасини олиб кириш ҳолати аниқланди. Бу ҳақда Давлат хавфсизлик хизмати хабар берди.
Маълум қилинишича, Форс кўрфази мамлакатларидан бирининг 1971 йилда туғилган фуқароси шахсига аниқлик киритилаётган қўшни республика фуқароси билан тил бириктириб, ўзи бошқарувидаги «Renault» русумли юк машинасида гиёҳвандлик моддасини хориждан Ўзбекистонга олиб келган.
Давлат хавфсизлик хизмати Самарқанд вилояти бўйича бошқармаси ходимлари Божхона ва Ички ишлар бошқармалари билан ҳамкорликда ўтказган тезкор тадбирлар давомида хорижлик фуқаро вақтинча яшаб турган Иштихон туманидаги уй кўздан кечирилган.
Текширув жараёнида соф оғирлиги 20 килограмм 239 грамм бўлган экстракцияланган опий аниқланиб, процессуал тартибда расмийлаштириб олинган.
Қайд этилишича, гиёҳвандлик моддаси юк машинасининг яширин жойига ҳамда иккита аккумулятор ичига яширилган ҳолда олиб келинган.
Ҳолат юзасидан хорижлик фуқаро ва бошқаларга нисбатан Жиноят кодексининг 246 ва 273-моддалари билан жиноят иши қўзғатилган. Ҳозирда тергов ҳаракатлари олиб борилмоқда, жиноятга алоқадор бошқа шахсларни аниқлаш чоралари кўрилмоқда.
