12 январь куни Туркиянинг Текирдағ вилоятидаги болалар уйида бўлган 15 ёшли бола бувиси ҳамроҳлигида Ўзбекистонга қайтарилди. Бу ҳақда Ўзбекистоннинг Истанбул шаҳридаги бош консулхонаси хабар берди.
Қайд этилишича, консулхонага 66 ёшли Я.Х. 15 ёшли невараси Я.А.ни Текирдағ вилоятидаги болалар уйидан Ўзбекистонга олиб кетиш юзасидан ёрдам сўраб мурожаат қилган. У 2022 йилдан буён турли маъмурий-ҳуқуқий тўсиқлар сабабли набирасини Ўзбекистонга олиб кета олмай, оғир шароитга тушиб қолган, дейилади хабарда.
2024 йилнинг сентябрь ойида Туркия суди томонидан Х.Я. набирасини қарамоғига олиш ҳамда Ўзбекистонга олиб кетиш ҳуқуқини берувчи қарор чиқарилган.
Бироқ қарор кучга киргунга қадар бола болалар уйидан қочгани сабабли унга нисбатан қидирув эълон қилинган. Шунингдек, болалар уйи маъмуриятининг тақдимномасига кўра Адлия органи томонидан бувиси Я.Х.га нисбатан "набирасини қочишини ташкиллаштиргани" юзасидан айб эълон қилинган.
Таъкидланишича, бош консулхона, Ташқи миграция агентлиги вакиллари, Аёллар ҳуқуқларини ҳимоя қилиш жамияти ҳамкорлигида юқоридаги айбловларни рад этиш ҳамда Я.А.ни Ўзбекистонга қайтариш юзасидан келишувга эришилган.
Истанбулдаги бош консулхона ўзбекистонликларни вояга етмаган фарзандларини хорижда назоратсиз қолдирмасликка чақирди.
