Тошкент шаҳрида миллийликни кенг тарғиб қилиш режалаштирилмоқда. Пойтахт ҳокими Шавкат Умурзоқов 21 январь куни “Тошкент шаҳрида миллийликни кенг тарғиб қилишга доир қўшимча чора-тадбирлар тўғрисида”ги қарорни имзолади.
Унга кўра, “Маҳаллий давлат ҳокимияти тўғрисида”ги қонун, президентнинг фармон ва қарорларига мувофиқ Тошкент шаҳрининг ижтимоий-маданий ривожланишини таъминлаш, миллий қадриятларни асраб-авайлаш, ўзбек халқининг миллий бой маданий меросини тарғиб қилиш, пойтахт аҳолисининг миллий либосларга эътиборини қаратиш орқали эстетик дидини ошириш, туризмни ривожлантириш мақсад қилинган.
Қарор билан миллийликни кенг тарғиб қилиш бўйича Тошкент шаҳар ишчи гуруҳи таркиби, миллийликни кенг тарғиб қилишга қаратилган “Миллий Тошкент” лойиҳаси асосида амалга ошириладиган ишлар юзасидан чора-тадбирлар режаси тасдиқланди. Ишчи гуруҳ 15 кишидан иборат бўлиб, унга Тошкент шаҳар ҳокимининг ўринбосари — Оила ва хотин-қизлар бошқармаси бошлиғи Шаҳноза Султанова раҳбарлик қилади.
Ишчи гуруҳининг асосий вазифалари қуйидагилар:
- миллий либослар ва миллийликни оммалаштиришга оид тарғибот материалларини ишлаб чиқиш;
- корхона, муассаса ва ташкилотлар ҳамда маҳалла фуқаролар йиғинлари билан ҳамкорликни ташкил этиш;
- оммавий тадбирлар даврида миллий либослар ва миллийликнинг мавқеини мустаҳкамланишини таъминлаш;
- миллий либослар ишлаб чиқарувчи тадбиркорлик субъектларини қўллаб-қувватлаш;
- мавзуга оид ўқув-семинарлари, танловлар ва бошқа тадбирларни ташкил этиш;
- қарорнинг бажарилиши юзасидан доимий назоратни амалга ошириш.
Тошкент шаҳар ҳокимининг ўринбосарлари, бошқарма ва ташкилотлар, туман ҳокимликлари миллий либосларда юришни, миллийликни тарғиб қилишни ва миллий маданиятни ривожлантиришни қўллаб-қувватлаш мақсадида моддий ва маънавий рағбатлантириш чораларни кўради.
Ҳужжатга кўра, Тошкент шаҳридаги давлат ташкилотлари, бошқарма ва муассасаларда ҳафтанинг ҳар жума куни “Миллий либослар куни” деб белгиланади ва барча корхона, муассаса ва ташкилотларнинг жамоаларида тарғиб қилинади. Тошкент шаҳар ва туман ҳокимликлари, ҳокимликлар қошидаги бошқарма, ташкилот ва бўлимлар, бошқа давлат органлари ва муассасалари ходимлари иш кунларида миллий либосларда юриши тавсия этилади (тасдиқланган хизмат кийимлари бундан мустасно). Ходимларнинг миллий либосларда юриши учун алоҳида шарт-шароитлар яратиб берилади.
Бундан ташқари, шаҳар миқёсида ўтказиладиган барча оммавий тадбирлар (байрамлар, фестиваллар, кўргазмалар, спорт мусобақалари, концертлар ва бошқалар) миллий услубда безатилишини ҳамда иштирокчиларнинг миллий либосларда бўлишини таъминлаш чоралари кўрилади. Оммавий тадбирларда энг яхши миллий либослар намойиши, миллий ўйинлар, миллий рақс ва қўшиқлар танловлари ўтказилиб, ғолибларга совғалар ҳамда дипломлар бериб борилиши ташкил этилади.
Жамоат транспортлари, метро вагонлари ва бекатларда “Миллий либос барчага ярашади” шиори остида миллийликни тарғиб қилувчи фото ва видеоматериаллар жойлаштирилиши кўзда тутилган.
Миллий қадриятлар ва миллий либослар мавзусида турли танловлар, викториналар, ўйинлар ҳамда бошқа тадбирлар ташкил этилиши ҳамда ушбу кўрик-танлов ва “челлендж”лар ўтказилиб, унда фаол иштирок этганлар ҳокимлик томонидан муносиб рағбатлантирилиши режалаштирилган.
