Президент Шавкат Мирзиёев "Атроф-муҳитни асраш" ва "яшил иқтисодиёт" йилининг давлат дастури лойиҳаси юзасидан йиғилиш ўтказди. Энергетика вазири Жўрабек Мирзамаҳмудов йиғилишда президент қандай топшириқлар бергани ҳақида айтиб ўтди.
"Бугун президентимиз ҳузурида бўлиб ўтган селектор мажлисида 2025 йил давомида давлат дастури доирасида бажариладиган ишлар бўйича аниқ вазифалар белгиланди. Жумладан, яшил энергия улушини ошириш, яшил энергияни барча тармоқларда, барча соҳаларда хонадонларгача жорий қилиш, буни максимал равишда қўллаб қувватлаш, тармоққа улаш ва аҳоли томонидан ортиқча ишлаб чиқарилган энергияни сотиб олиш таъкидланди. Бу учун механизмлар, режалар нафақат ишлаб чиқариш, балки буни аниқ манзилли маҳаллабай ишни ташкил қилган ҳолда жорий қилиш бўйича аниқ кўрсатма ва топшириқлар берилди", — деди вазир.
Жумладан, 3,5 минг мегаватт янги генерация қувватларига қўшимча равишда 1 минг мегаватт энергетика қувватларини яратилади. 2 йил ичида 3 мингга яқин кичик гидроэлектростанциялар қуриш, аҳоли ва хўжалик субъектларини камида 50 фоиз томларини қуёш панеллари билан қоплаш бўйича кўрсатмалар ва дастур ишлаб чиқариш топширилган.
Бундан ташқари, вазирнинг таъкидлашича истеъмол қилинаётган электр энергия, табиий газ ва бошқа иссиқлик манбаларини тежаш, жумладан, бинолардаги энергосамарадорлик ресурслардан умумий фойдаланиш бўйича дастур киритиш топшириғи берилган.
"Дастурда энергия самараси паст бўлган корхоналарни модернизация қилиш, янги ишлаб чиқариш қувватларини жорий қилишга алоҳида эътибор қилиш кераклиги таъкидланди", — дейди вазир.
