Ходим қўлига пичоқ олиб, аёли ва фарзандини ўлдирмоқчи бўлган эркакни бу ишидан қайтармоқчи бўлган. Аммо эркак ходимни пичоқлаган.
Маълум қилинишича, Қамаши туманидаги ҳодиса эр ва хотир ўртасидаги жанжалдан бошланган. Аёл эр билан яшамаслигини билдириб, ўз уйига кетмоқчи бўлган. Аммо, эр бунга қаршилик қилиб, жанжал чиқарган ва ўз фарзандини қўлига олиб, агар аёли кетиб қолса, ўзини ва фарзандини ўлдиришини айтган.
Аёл эса ИИОга қўнғироқ қилиб, ёрдам сўраган. Воқеа жойига бир нечта профилактика инспекторлари келиб, эркакнинг қўлидаги пичоқни олиб қўйишга ҳаракат қилаётганида эркак ходимлардан бирининг бел қисмига пичоқ санчиб олган. Ходим тан жароҳати билан шифохонага мурожаат қилган.
"Ҳозир соғлигим яхши, шифокорлар ёрдам кўрсатди", - дейди жароҳатланган ходим.
Мазкур ҳолат юзасидан тегишли ҳужжатлар расмийлаштирилиб, Қамаши тумани прокуратурасига юборилган.
Шунингдек, Бош прокуратура хабарига кўра, эркакка нисбатан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилди.
Гумонланувчи шахс процессуал тартибда ушланган. Тергов ҳаракатлари давом этмоқда.
