Кремль матбуот котиби Дмитрий Песков АҚШ вице-президенти Жей Ди Вэнснинг Украинада Америка ҳарбийларини жойлаштириш эҳтимоли ҳақидаги баёноти янги позиция эканини таъкидлади.
Вэнс, агар тинчлик музокаралари барбод бўлса, АҚШ ҳарбийлари Украинага юборилиши мумкинлигини истисно қилмади. Кремль вакили бу каби баёнотлар аввал учрамаганини ва Россия ҳукумати батафсил изоҳ олишга умид қилишини билдирди.
"Америка матбуотига берилган интервью ҳақида гапирадиган бўлсак, бу янги позиция элементларидир. Илгари биз бунақа баёнотларни эшитмаганмиз. Улар расман эълон қилинмаган. Шунинг учун, албатта, биз айтган музокаралар жараёнида қўшимча тушунтиришлар олишга умид қиламиз", — деди Песков матбуот анжуманида.
Жей Ди Вэнснинг сўзлари The Wall Street Journal нашрида келтирилган. Лекин мақолада Америка ҳарбийларини юбориш ҳақидаги бевосита иқтибос келтирилмаган. Материалда вице-президентнинг қуйидаги сўзлари бор эди:" Иқтисодий босим воситалари мавжуд, албатта, ҳарбий воситалар ҳам бор". Нашр Америка ҳарбийларини Украинага юбориш масаласи муҳокамада қолаётганини факатгина билвосита тарзда қайд этган. Шу билан бирга, куни кеча Пентагон раҳбари Пит Хегсет АҚШ ҳарбийларини Украинага жойлаштириш имкониятини очиқчасига инкор этди.
Маълумки, 12 февраль куни Дональд Трамп ва Владимир Путин телефон орқали суҳбатлашган эди. Суҳбатдан сўнг, Москва ва Вашингтон ўртасида икки томонлама мулоқотни қайта тиклаш ва Украина можаросини муҳокама қилиш учун музокара гуруҳларини шакллантириш ишлари бошланди.
Абдуллоҳ Саййид
