Украина Президенти Владимир Зеленский Испания ва Лотин Америкаси давлатларидан мамлакат энергетика инфратузилмасини тиклашда ёрдам сўради. Бу ҳақда у 5 ноябрь куни Мадридда бўлиб ўтган 30-Иберо-Америка саммити иштирокчиларига йўллаган мурожаатида маълум қилди.
Зеленскийнинг айтишича, Россиянинг ракета ва дрон ҳужумлари оқибатида Украинадаги барча электр станциялари у ёки бу даражада зарар кўрган. Энергетика тизимидаги вазиятни барқарорлаштириш учун мамлакатга шошилинч равишда янги ускуналар зарур.
Украина Президенти, хусусан, Бразилия, Мексика, Аргентина ва Колумбиядан трансформаторлар, Чилидан электр кабеллари, Испаниядан эса электр ускуналари, кабеллар ва генераторлар етказиб беришда кўмак сўраган.
«Бизга электр тармоғимизга мос келадиган ускуналар керак. Ва улар тезкорлик билан етказиб берилиши зарур», — деди Зеленский.
Унинг таъкидлашича, Украина энергетика тизимидаги зарарларни бартараф этиш учун минглаб мутахассислар кечаю кундуз ишламоқда. Бироқ мавжуд инфратузилмани тиклаш учун халқаро ҳамкорликни кенгайтириш зарур.
Бу мурожаат мамлакатда электр таъминоти билан боғлиқ вазият кескинлашган бир пайтда янгради. «Укринформ» хабарига кўра, 6 ноябрь куни Киевда электр таъминотида жиддий узилишлар кузатилган. Хусусан, Днепр дарёсининг ўнг соҳилидаги айрим туманларда фавқулодда электр узилишлари жорий этилган.
Аввалроқ, 3 ноябрь куни Россия Мудофаа вазирлиги Украина энергетика инфратузилмаси объектларига зарбалар берилганини маълум қилган. Вазирлик баёнотига кўра, Винница, Днепропетровск ва Харьков вилоятларидаги энергетика объектлари нишонга олинган. Улар орасида Ладижин, Кривой Рог, Днепр ва Харьков иссиқлик электр станциялари, шунингдек, Змиев ва Лосево электр подстанциялари ҳам бор.
Шунингдек, 3 ноябрь куни Киевдаги учта метро йўналиши техник сабабларга кўра фаолиятини вақтинча тўхтатган. DTEK энергетика компанияси Киев, Киев ва Днепропетровск вилоятларида фавқулодда электр узилишлари бошланганини билдирган.
Киев мэри Виталий Кличко шаҳардаги электр таъминоти билан боғлиқ вазиятни ўта мураккаб деб баҳолаган. «Укрэнерго» эса авариявий ўчиришларни жорий этиб, энергетиклар таъминотни тиклаш устида иш олиб бораётганини маълум қилган.
Бундан ташқари, Россия Мудофаа вазирлиги 6 ноябрга ўтар кечаси Днепропетровск вилоятидаги электр подстанциясига ҳам зарба берилганини билдирган.
Россия томони энергетика инфратузилмасига берилган зарбаларни Украина ҳарбий-саноат мажмуаси ва Қуролли кучлари фаолиятини таъминловчи объектларга қарши ҳаракатлар сифатида изоҳламоқда.
