Украина президенти Владимир Зеленский Трампнинг охирги баёнотларига жавоб қайтарди.
Зеленский шу муносабат билан ташкил этилган матбуот анжуманида бир қатор масалаларга изоҳ бериб ўтди.
Дональд Трамп сўнгги баёнотида Зеленскийнинг обрўси тушиб кетгани, у рейтингда 4 фоиз маъқуллаш овози олганини айтган эди. Украина етакчиси ўзининг ва бошқа етакчиларнинг рейтинглари ҳақида изоҳ беришни маъқул кўрмаслигини айтди, бироқ сўнгги сўровномаларга кўра, украиналикларнинг 58% уни қўллаб-қувватлашини таъкидлади.
"Шундай экан, ҳозир менинг ўрнимга кимдир келмоқчи бўлса, бу иш бермайди", — деди у.
Зеленский, шунингдек, Россия томонидан тарқатилаётган дезинформация ҳақида гапириб, бу маълумотлар АҚШга ҳам етказилаётганини айтди.
"Афсуски, биз жуда ҳурмат қиладиган миллат етакчиси сифатида президент Трамп шундай дезинформация пуфагида яшаяпти", — деди у.
Украина етакчиси Россия тарқатаётган ёлғон маълумотларга қарши курашиш учун жаҳон етакчиларига нисбатан ишонч даражаси бўйича кўпроқ маълумот йиғиш ниятида эканини билдирди. У Трамп атрофидаги "дезинформация доираси" ҳақида огоҳлантириб, бу гуруҳга Маҷаристон ва Словакия ҳукуматлари билан боғлиқ шахслар ҳам киришини таъкидлади.
"Бу жиддий хавотир уйғотади. Уларнинг барча ҳаракатлари Украина заиф бўлиши учун қаратилган", — деди у.
Зеленский, шунингдек, Украина "уриш бошланганидан бери анча кучли" эканини таъкидлаб, "Украина муваффақиятсизликка учраган, Россия эса ҳамма нарсани эгаллаб олган ва кучли армияга эга" деган қарашларни рад этди.
Унинг сўзларига кўра, Украина "анча чидамлироқ" бўлиб, бу "бизга иттифоқчилар ёки шериклар билан тенглик асосида, ўз қадр-қимматимиз билан музокара олиб бориш имконини беради".
Шунингдек, у Украина ҳозирда ўз эҳтиёжларининг 30%ини мустақил равишда қондира олаётганини қайд этди.
Зеленский НАТОдан ташқари хавфсизлик кафолатлари бўйича назарий музокаралар мураккаб кечаётганини, чунки бунинг учун янгидан форматлар яратишга вақт етишмаётганини айтди.
"Бизга бу йил хавфсизлик кафолатлари керак, урушни ҳам шу йил тугатмоқчимиз", — деди у ва НАТО табиий кафил бўлишини таъкидлади.
"Ҳар сафар НАТО ҳақида гапирсам, улар бу сўзни тилга олмаслигимизни хоҳлайдилар, аммо биз айнан шу ҳолатдамиз", — деди у.
У, шунингдек, украиналиклар "ҳеч қандай ўйин ўйнамаётгани, яширин келишувлар йўқлиги" ва ўз фикрларини очиқ ифода этаётганини билдирди.
Зеленскийнинг таъкидлашича, хавфсизлик кафолатлари НАТО орқали ёки Украина армиясини кучайтириш – молиявий ёрдам, қурол ва ҳаво мудофааси билан таъминлаш йўли орқали амалга оширилиши мумкин.
Зеленский АҚШ билан Украинадиг ер ости минераллар бооарсидаги келишувга ҳам тўхталиб ўтди. Зеленский Трампнинг АҚШ Украинга 500 миллиард доллар ёрдам бергани ҳақидаги иддаосини рад этди ва Украина бунинг эвазига минерал ресурслар беришни ўз ичига олган келишувга рози бўлиши керак деган фикрни "жиддий суҳбат" деб ҳисобламаслигини билдирди.
"Аммо, агар бу ҳужжат хавфсизлик кафолатларини ўз ичига олса, мен жиддий келишув устида ишлашга тайёрман", — деди у.
"Яхши, шартнома тузайлик қилайлик. Улушларни инвестицияга қараб тақсимлайлик, лекин бизга хавфсизлик кафолатлари керак", — деди у.
Зеленский мазкур шартнома таклифини очиқ эълон қилишга тайёрлигини билдирди, бироқ бу АҚШ-Украина муносабатларига фойда келтиришини ўйламаслигини айтди.
"Бу ҳужжат ҳали тайёр эмас. У менинг ваколатларим доирасидан ташқари, Украина конституцияси ва қонунларидан ташқари. Унинг юрисдикцияси Нью-Йорк қонунчилигига тегишли", — деди у.
Бироқ энг муҳими, "у ерда хавфсизлик кафолатлари ҳақида бирорта ҳам сўз йўқ", — дея қўшимча қилди у.
"Ҳамма ғалаба қозонишни истайди. Биз Трамп ғалаба қозонишини истаймиз, Украина ғалаба қозонишини истаймиз, ҳаммамиз муваффақиятга эришишни истаймиз. Лекин ҳозирча ҳеч нарса аниқ эмас.
Мен фоизлар асосида келишувни белгилашни таклиф қилдим. Лекин, энг муҳими, мен Украинани ҳимоя қиламан. Мен уни сотолмайман. Мен юртимизни сотолмайман", — деди Зеленский.
