Швейцария Россиялик миллиардерлар Алишер Усмонов ва Михаил Фридманга нисбатан санкцияларни бекор қилди. Бироқ мамлакатнинг чекловлар рўйхатига Россия билан боғлиқ яна 254 та янги банд киритилди. Бу ҳақда РБК хабар берди.
Швейцария Иқтисодиёт бўйича давлат котибияти (SECO) маълумотларига кўра, Усмонов ва Фридмандан ташқари, Қрим федерал университетининг собиқ ректори Андрей Фалалеев ҳамда "Redbird Corporate Services Ltd" компаниясига нисбатан ҳам санкциялар бекор қилинган.
Шунингдек, Россия Давлат думасининг собиқ депутати Юрий Швиткин ва конструктор Александр Леонов вафот этгани сабабли санкциялар рўйхатидан чиқарилган.
Айни вақтда Швейцария санкциялар рўйхатига 254 та янги банд қўшган. Улар орасида Россиянинг 33 та банки, учинчи давлатда жойлашган битта банк, 17 та молиявий муассаса ва криптохизматлар етказиб берувчиси, учинчи давлатларга тегишли бешта компания, шунингдек, Россиянинг тўртта аэропорти ва иккита порти бор.
SECO маълум қилишича, ташқи сиёсий ва ҳуқуқий омиллар баҳоланганидан сўнг, Россиянинг икки фуқаросини ҳозирча санкциялар рўйхатига киритмасликка қарор қилинган. Шунингдек, учинчи давлатларга тегишли 14 та компанияга нисбатан экспорт назоратини кучайтириш чоралари ҳам қўлланилмаган.
Қайд этилишича, Европа Иттифоқининг санкциялар бўйича 20-пакетида назарда тутилган амалий чоралар савдо чекловларини четлаб ўтишнинг олдини олишга қаратилган.
