Ғазо секторида соғлиқни сақлаш тизимини тиклаш учун камида 7 миллиард доллар талаб этилади.
БМТ Жаҳон соғлиқни сақлаш ташкилоти (ЖССТ) маълумотларига кўра, Ғазо секторида соғлиқни сақлаш тизимини тўлиқ тиклаш учун камида 7 миллиард доллар маблағ зарур.
ЖССТнинг Фаластин ҳудудлари бўйича вакили Рик Пеперкорннинг маълум қилишича, ҳудуддаги тиббий инфратузилма жиддий шикастланган, касалхоналарнинг аксарияти фаолият юрита олмаяпти, ҳамшира ва шифокорлар етишмовчилиги кузатилмоқда.
"Ғазо секторидаги соғлиқни сақлаш муассасаларининг аксарияти вайрон бўлган ёки жиддий зарар кўрган. Бу эса аҳолининг тиббий хизматларга бўлган эҳтиёжини қондиришда катта муаммоларни келтириб чиқармоқда", — деди Пеперкорн.
Унинг айтишича, ҳозирги пайтда Ғазодаги 36 касалхонадан тахминан 18 таси қисман қайта ишга туширилган. Шунингдек, бешта дала касалхонаси ҳам ишламоқда. Бунга Фаластин тиббиёт ходимлари ва ҳамкорларининг фидойилиги ва матонати сабаб бўлди. Улар босқинчи Яҳудий давлати армиясининг мунтазам ва вайронкор зарбалари остида ҳам ярадорлар ва беморларга ёрдам беришдан тўхтамади.
Буюк Британиянинг Guardian газетаси ёзишича, Исроил армияси Ғазо секторида 46000 тинч аҳоли вакилларини (уларнинг аксарияти аёллар ва болалар), 400 га яқин тиббиёт ходимини ўлдирди. Шунингдек, 160дан зиёд тиббиёт ходимлари турли баҳоналар билан Исроил қамоқхоналарига ташланди ва улар ҳамон озод қилинмаган. Бу маҳбуслар мунтазам қийноққа солинмоқда. Шунингдек, 30 га яқин тиббиёт ходими бедарак йўқолган.
Жаҳон соғлиқни сақлаш ташкилоти шифокор тутқинларнинг саломатлиги ва хавфсизлиги борасида чуқур ташвиш изҳор қилган холос.
Доктор Пеперкорннинг айтишича, барча соҳалар, жумладан, соғлиқни сақлаш учун ҳам ўт очишни тўхтатиш ва барқарор тинчлик жараёнига ўтиш муҳим эди.Унинг таъкидлашича, тиббиёт соҳасини тиклаш нафақат молиявий ресурсларни, балки бутун дунё ҳамжамиятининг саъй-ҳаракатларини талаб қилади. ЖССТ халқаро ҳамжамиятни Ғазо секторида тиббий ёрдамни кенгайтириш ва тезкор тиклаш жараёнини молиялаштиришга чақирди.
Абдуллоҳ Саййид
