АҚШ президенти Дональд Трамп Украина президенти Владимир Зеленский у билан бўлган можародан кейин Оқ уйга қайтишни истаётганини айтди. Трамп таклифни рад этганини қўшимча қилди.
"Энди у ҳозир қайтишни истаётганини айтмоқда. Аммо мен бундай қила олмайман", — деди Дональд Трамп журналистларга.
У суҳбатни давом эттиришни истамаслигининг сабабини кўрсатмаган.
Fox News'га берган интервьюсида Владимир Зеленский, агар унга ҳозир Оқ уйга қайтиш таклиф қилинса, рад этишини айтди. Унинг сўзларига кўра, у "ёмон нарса" қилмаган ва узр сўраши керак деб ҳисобламайди.
Fox News хабарига кўра, АҚШ томони Владимир Зеленскийдан Оқ уйни тарк этишни сўраган. Axios нашрининг манбаларига кўра, Украина президенти Киев делегацияси билан бирга тахминан бир соат давомида фойдали қазилмалар бўйича битим имзоланишини кутган.
Владимир Зеленский: "Биз жанг қилишни хоҳлаб турганимиз йўқ"
Трамп билан шов-шувли музокаралардан сўнг Зеленский Fox News телеканалига интервью берди. Унинг таъкидлашича, Украина АҚШнинг ҳамкори бўлиб қолишни истайди ва ресурслар бўйича келишувга тайёр, аммо Россия билан тинчлик ўрнатиш учун унга хавфсизлик кафолатлари керак.
"Уруш тугашини украиналиклардан кўпроқ ҳеч ким хоҳламаяпти", деди Зеленский. Бироқ, дея давом этди у, Украина халқи адолатли ва мустаҳкам тинчликни истайди, бу эса Қўшма Штатлар хавфсизлик кафолатларисиз мумкин эмас. У бўлмаса украиналиклар "Путин эртага қайтиб келади" деб қўрқишади, чунки Россия президенти келишувларни бир неча марта бузган, дея таъкидлади Украина раҳбари.
Зеленский Трамп билан можароси "ҳар икки томон учун ҳам ёмон" эканини айтди, бироқ у ўзини "ёмон иш қилган" деб ўйламаяпти ва кечирим сўраши керак эмас. Музокараларни давом эттириш учун ҳозир Оқ уйга қайтишга тайёрми, деган саволга Украина президенти: "Йўқ", деб жавоб берди.
Студиядаги мулоқот чоғида Дональд Трампнинг Оқ уйдаги учрашувдан сўнг Зеленский ҳақида айтган: "У жанг қилишда, курашишда давом этишни хоҳлайди" деган баёноти акс этган видео намойиш этилди.
"Биз жанг қилишни хоҳлаб турганимиз йўқ", — дея изоҳ берди Украина президенти видеога. "Мен ўз фуқароларимизни, аскарларимизни ҳурмат қиламан. Шунинг учун Украина қачон ва қандай кафолатлар олиши ҳақида аниқ маълумотга эга бўлмасам, қайтиб келолмайман".
