Италия бош вазири Жоржа Мелони АҚШ ва Европа давлатлари ўртасида шошилинч саммит ўтказиш таклифини илгари сурди. Унинг сўзларига кўра, бу учрашув Ғарб давлатлари ўртасидаги келишмовчиликларни ҳал қилиш ва келажакдаги муаммоларни муҳокама қилиш учун зарур, дея ёзмоқда "Замон.уз".
Мелони ушбу баёнотни Оқ уйда Доналд Трамп ва Владимир Зеленский ўртасида юз берган келишмовчилик ортидан берган.
"Биз йиллар давомида ҳимоя қилиб келаётган Украинадан тортиб, бугунги куннинг бошқа долзарб масалаларигача – биз қандай ечим топишимиз ва келажакда дуч келадиган қийинчиликларни қандай енгишимиз ҳақида очиқ суҳбат ўтказишимиз керак. Ғарбда бўлиниш кучайса, бу бизни заифлаштиради ва бизнинг инқирозга юз тутишимизни истаганларга фойда келтиради", – деди Мелони.
Италия бош вазирининг бу чақириғи Европа ва АҚШнинг глобал масалаларда ҳамкорлигини мустаҳкамлашга қаратилган муҳим ташаббус сифатида кўрилмоқда.
