АҚШ президенти Доналд Трамп Конгресснинг иккала палатасига мурожаат қилди.
Даставвал "Америка қайтди", — деди президент нутқининг бошида.
Трампнинг сўзларига кўра, ҳозирги маъмурият атиги бир неча ҳафта ичида илгари ҳеч қайси ҳукумат йиллар давомида эриша олмаган натижаларга эришди.
"Америка орзусини тўхтатиб бўлмайди ва мамлакатимиз шундай улкан қайтиш арафасида турибдики, дунё тарихида ҳеч ким бунақасини кўрмаган, эҳтимол, бундан кейин ҳам кўрмайди", — дея таъкидлади президент.
"Биз Байден томонидан жорий қилинган барча чекловларни бекор қиламиз. Байден — Америка тарихидаги энг ёмон президент" деди у.
Демократлар партияси вакиллари норозилик билдириб, Трампни ҳуштакбозлик билан кутиб олдилар. Вакиллар палатаси спикери Майк Жонсон тартибни сақлашга чақирди ва президент нутқини бузишга уринганларни залдан чиқариб юбориш билан таҳдид қилди.
Ушбу нутқ Трампнинг Оқ уйга қайтганидан кейин Конгрессдаги биринчи чиқиши ҳисобланади. Бу анъанавий тадбир бўлиб, унда президент ўзининг дастлабки бир неча ҳафталик фаолияти натижаларини сарҳисоб қилади. Трамп 44 кундан бери президент лавозимида ишламоқда.
