AҚШ президенти Дональд Трамп маъмурияти ҲAМAС ҳаракати билан бевосита алоқага киришиб, америкалик гаровга олинганларни озод қилиш ва Ғазо секторида кенг миқёсли ўт очишни тўхтатиш бўйича музокаралар олиб бормоқда. Бу ҳақда AXIOS портали ўз манбаларига таяниб хабар берди.
Маълум қилинишича, Доҳада Трампнинг гаровга олиш масалалари бўйича махсус вакили Aдам Бейлер ва ҲAМAС вакиллари ўртасида учрашувлар ўтказилган.
Шунингдек, AҚШ 1997 йилдан буён террорчи ташкилот сифатида тан олган ҲAМAС билан илгари ҳеч қачон бундай музокаралар ўтказмагани таъкидланмоқда. AҚШ ҳукуматининг ҳаракатлари Ғазодаги гаровга олинган шахсларни озод қилиш ва Фаластин-Исроил ўртасида узоқ муддатли сулҳга эришишга йўналтирилган. Шунга қарамай, томонлар ҳозирча келишувга эриша олмаган.
AXIOS нашрининг манбалари маълумотига кўра, AҚШ президентининг махсус вакили Стивен Уиткофф шу ҳафта Доҳада Қатар Бош вазири билан ўт очишни тўхтатиш масаласини муҳокама қилишни режалаштирган эди. Бироқ музокаралар натижасиз тугагани сабабли ушбу ташриф 4 март куни бекор қилинган.
Январ ойи ўрталарида Исроил ва ҲAМAС Миср, Қатар ва AҚШ воситачилигида Ғазо секторида ўт очишни тўхтатиш бўйича келишувга эришган эди. Ушбу келишув 19 январдан кучга кирган бўлиб, унинг биринчи босқичи 1 март куни якунланди.
Биринчи босқич доирасида барча исроиллик гаровга олинган шахслар ва ҳалок бўлганларнинг жасадлари ватанларига қайтарилган. Бунинг эвазига Исроил 1500 дан ортиқ фаластинлик маҳбусни озод қилган, уларнинг бир қисми эса Фаластин ҳудудидан чиқариб юборилган.
Шунингдек, 2 март куни Исроил Ғазога инсонпарварлик ёрдамини тўхтатган. Ушбу қарор ҲAМAСнинг Уиткофф томонидан таклиф қилинган сулҳ шартларини қабул қилишдан бош тортгани билан изоҳланган.
Абдуллоҳ Саййид
