Кеча, 5 март куни Россия армияси Украинанинг Кривой Рог шаҳридаги меҳмонхонага ракета зарбаси йўллади. Оқибатда 2 киши ҳалок бўлди. Бу ҳақда Фавқулодда вазиятлар давлат хизмати хабар берди.
“Ёнғин содир бўлди. Фуқаролик инфратузилмаси шикастланди. Эҳтимол, вайроналар остида одамлар бўлиши мумкин. Оқибатлар бўйича маълумотларни аниқлаштиряпмиз”, деб ёзди Днепропетровск вилояти маъмурияти раҳбари Сергей Лисак ўзининг Telegram-каналида.
Украина Фавқулодда вазиятлар давлат хизмати маълумотларига кўра, ракета беш қаватли меҳмонхонага келиб тушган. Оқибатда 2 киши ҳалок бўлган, 29 киши жароҳатланган. Улар орасида бир бола ҳам бор. Жуда оғир аҳволда бўлган 20 киши шифохонага ётқизилган.
“Уларга барча зарурий тиббий ёрдам кўрсатилмоқда”, деди Лисак.
Маълумотларга кўра, 18 кишини қутқаришнинг уддасидан чиқилган, бироқ вайроналар остида ҳали ҳам одамлар бўлиши мумкин. Ҳужумдан бироз олдин Украина ҳаво кучлари Россия томонидан баллистик қурол қўлланиши мумкинлиги ҳақида огоҳлантирган, шунингдек, “Кривой Рог устида юқори тезликда ҳаракатланаётган нишон” кузатилаётгани эълон қилинган. Кейинчалик Украина ҳарбийлари Днепропетровск, Донецк, Сум, Харьков ва Чернигов вилоятларида Россия дронлари ва бошқарилувчи авиабомбалари ҳужум хавфи мавжудлиги ҳақида хабар берган.
“Военный осведомитель” маълумотларига кўра, Кривой Рогдаги меҳмонхонага “Искандер” ракетаси билан зарба берилган. “Военкоры Русской весны” эса Россия мунтазам равишда шаҳардаги меҳмонхоналарни нишонга олаётганини таъкидлаган. Канал муаллифининг сўзларига кўра, бу меҳмонхоналар “Украина қуролли кучларининг жойлашиш масканларига айлантирилаётгани” сабабли содир бўлмоқда. Бироқ бу иддаони тасдиқловчи далиллар келтирилмаган.
