Шавкат Мирзиёев АҚШнинг марказий ва жанубий штатларида рўй берган ҳалокатли торнадолар оқибатида кўплаб инсонлар қурбон бўлгани, жароҳат олгани ва катта талафотлар кўрилгани муносабати билан Дональд Трампга таъзия мактуби йўллади. Бу ҳақда Ўзбекистон президенти матбуот котиби Шерзод Асадов маълум қилди.
Давлатимиз раҳбари вафот этганларнинг яқинларига сабр-тоқат ва бардамлик, жароҳат олганлар тез фурсатда шифо топишини тилади, дейилади хабарда.
АҚШ расмийларига кўра, еттита штатда бўрон билан боғлиқ ҳодисаларда камида 39 киши ҳалок бўлган, бир неча киши бедарак йўқолган, деб ёзмоқда CNN. Миссури штати 12 та ўлим ҳолати билан рекорд даражадаги энг кўп ўлим кўрсаткичига эга, ундан кейин Канзас — саккиз ўлим.
Алабаманинг аксарият қисми жиддий зарар кўрди ва штатда камида уч киши вафот этди. Шунингдек, юз минглаб истеъмолчи электр таъминотидан узилди.
Кучли бўронлардан энг кўп зарар кўрган штатлар — Миссисипи, Миссури, Техас, Оклахома, Канзас ва Арканзас. Табиий офат чанг бўронлари билан бирга келади. Қурбонларнинг бир қисми кўринишнинг ёмонлашиши шароитида автомобиллар тўқнашуви оқибатида ҳалок бўлган, дея таъкидлайди Америка ОАВ.
