АҚШда 31 ёшли Боувен Ваннинг ота-онаси қизининг ўлими юзасидан OpenAI компаниясини судга берди. Даъвога кўра, ChatGPT эпилепсиянинг оғир турига чалинган қизни тутқаноққа қарши дорини қабул қилишни тўхтатишга ундаган ва буни шифокорлардан яширишни "ишончли стратегия" деб атаган. Бу ҳақда The New York Times хабар берди.
Маълум қилинишича, Боувен Ван Amazon компаниясида дастурчи бўлиб ишлаган. У 2026 йил январь ойида компаниядаги қисқартиришлар сабаб ишидан айрилган. АҚШда қолиш учун февраль ойининг ўрталарига қадар янги иш топиши керак бўлган қиз тутқаноққа қарши қўлланадиган ламотриджин дорисининг кунлик 400 миллиграммлик дозасини камайтириш мумкинлиги ҳақида ChatGPT’дан сўраган.
Ваннинг айтишича, дори унинг нутқи ва фикрлаш тезлигига салбий таъсир кўрсатаётган эди. Даъво аризасида келтирилишича, чатбот унга бир неча ҳафта ичида дорини бутунлай тўхтатиш имконини берувчи дозани камайтириш жадвалларини тузиб берган. Шунингдек, дори қабул қилишни тўхтатиш режасини шифокордан яширишни ҳам маъқуллаган.
The New York Times нашри Ваннинг чатбот билан ёзишмаларини ўрганган. Унга кўра, қиз дорини қабул қилишни тўхтатиш билан боғлиқ хавотирлари ҳақида сунъий интеллект билан камида 158 марта суҳбатлашган. ChatGPT эса унда кузатилган фикрлашдаги узилишлар ва ўқишдаги қийинчиликларни миянинг қайта мослашиш жараёни билан изоҳлаган.
Қизнинг ҳаётининг сўнгги кунларида ҳам чатботдан дори қабул қилиш масаласида маслаҳат сўрагани айтилмоқда. Нашр келтирган ёзишмаларга кўра, у дорини қабул қилишни давом эттириш керакми, деб сўраганида, чатбот дозани ноль миллиграммда сақлашни тавсия қилган.
Боувен Ван 2026 йил февраль ойида вафот этган. Унинг ўлими сабаби эпилепсия билан боғлиқ тўсатдан кутилмаган ўлим сифатида қайд этилган.
Ота-онасининг даъвосида OpenAI чатботи лицензиясиз тиббий маслаҳат беришда айбланган. Шунингдек, компания маҳсулоти шифокорларни ёрдам берувчи мутахассислар эмас, балки режага тўсқинлик қилувчи шахслар сифатида кўрсатгани таъкидланган.
OpenAI вакили Дрю Пусатери ушбу воқеани "ақл бовар қилмас даражада юракни эзадиган" ҳолат деб атаган. У гап ChatGPT’нинг аввалги версияси ҳақида кетаётганини билдирган. Ван фойдаланган GPT-4o модели эса 13 февраль куни, унинг тахмин қилинаётган вафотидан бир кун ўтиб, илова таркибидан олиб ташлангани айтилган.
