Тошкент метрополитенининг "Буюк Ипак йўли" ёки "Пушкин" бекатидан ТТЗ даҳасигача 10 та бекат қурилади. Бу ҳақда Шавкат Мирзиёев 20 март куни Тошкент шаҳрида амалга оширилаётган қурилиш ва ободонлаштириш ишлари билан танишув вақтида маълум қилди.
Қайд этилишича, Тошкент метрополитенини Тошкент трактор заводи даҳасигача олиб бориш режалаштирган. Президент аввал тақдим қилинган лойиҳаларни қайта кўриб чиқиш, бошқа муқобил таклифлар киритиш бўйича топшириқ берган.
Шунга мувофиқ тайёрланган янги лойиҳага кўра, "Буюк Ипак йўли" ёки "Пушкин" метросидан Тошкент трактор заводи даҳасигача 10 та бекат қурилади. Бу тармоқ 30 та маҳалла, 148 минг аҳолини қамраб олади.
2022 йилда тақдим этилган лойиҳага кўра "Буюк ипак йўли" бекатидан Тошкент трактор заводи даҳасигача ерости йўли ҳамда ерусти ҳалқа метросининг иккинчи босқичини амалга ошириш режалаштирилган эди. Ўша тақдимотда янги ерости йўлини Мирзо Улуғбек кўчаси ёки Буюк ипак йўли кўчаси орқали олиб ўтиши таъкидланганди.
Дастлабки ҳисоб-китобларга кўра, биринчи ҳолатда йўл узунлиги 8,6 км, кунлик йўловчилар сони 62 минг бўлади. Бу лойиҳада 6 та станцияни қуриш мўлжалланган эди. Иккинчи вариантда эса масофа салкам 8 км бўлиб, кунига 55 минг кишига хизмат кўрсатилиши мумкин. Қурилиш ишлари беш йилга мўлжаллангани айтилганди.
