Ўзбекистонда 21−22 март кунлари электр энергияси учун онлайн тўлов қилишда узилишлар кузатилади. Бу ҳақда "Ҳудудий электр тармоқлари" ахборот хизмати хабар берди.
Маълум қилинишича, "HET Billing" дастурий комплексини такомиллаштириш мақсадида зарур техник ишлар олиб борилиши муносабати билан 21−22 март кунлари Маълумотларни қайта ишлаш марказида профилактик ишлар олиб борилади.
Мазкур вақт оралиғида электр энергияси учун онлайн тўловларни амалга ошириш ҳамда шахсий ҳисоб рақамдаги мавжуд маълумотларни олишда техник узилишлар бўлиши мумкин.
Истеъмолчиларга қулайлик яратиш мақсадида айни муддатда қарздор истеъмолчилар автоматик тарзда тармоқдан ажратилмайди. Келтирилган ноқулайликлар учун олдиндан узр сўраймиз, дейилади хабарда.
