Қўшма Штатларнинг амалдаги президенти — Дональд Трамп “кўплаб одамлар унинг президентликда қолишини хоҳлаётгани” учун “3-марта президент бўлишига йўл топиши мумкинлигини” айтди. Бу ҳақда “DW” нашри маълум қилди.
Қайд этилишича, Дональд Трамп “NBC” телеканалига берган интервьюсида 3-марта президент бўлиш борасидаги қарори жиддий эканлигини билдириб, бу борада “ҳазиллашмаётганини” таъкидлаган.
“NBC” телеканали журналисти АҚШ раҳбаридан қайта президентликка сайланиш учун қандай усуллардан фойдаланасиз? деган саволини берганида Трамп жавоб беришдан бош тортган.
Аммо у витсе-президент Жей Ди Венс президентлик сайловларида ғалаба қозониб, кейин президентлик лавозимини унга ўтказиши мумкинлиги ҳақидаги тахминни инкор қилмаган.
Шу билан бирга, Трамп ҳозирги маъмуриятда эндигина иш бошлаганини, олдинда ҳали “узоқ йўл” турганини ва ҳозирги вазифаларига кўпроқ эътибор қаратаётганини айтган.
Шунингдек, АҚШ етакчи президентлик лавозимида ишлаш унга ёқишини ҳам қўшимча қилган.
Маълумот учун, АҚШ Конституциясининг 22-таҳририга кўра, бир шахс икки муддатдан ортиқ президент бўла олмайди.
