Ўзбекистондаги масжидларда иссиқ сув ва иситиш тизими назоратдан ўтказилмоқда. Бу ҳақда Мусулмонлар идораси матбуот хизмати хабар берди.
Идоранинг қайд этишича, мусулмонлар эркин ибодат қилиши, қулай ва хавфсиз шароитлар яратиш учун режали ишлар доимий амалга ошириб келинади. Айниқса, байрам кунлари, катта жамоат йиғиладиган вақтларда масжид хонақоҳлари, қўшимча бинолари, таҳоратхоналари ва туташ бўлган иншоотларда катта урғу қаратилади.
"Айни кунларда ҳам масжидларнинг техник ва ёнғин хавфсизлиги талабларига мувофиқлиги, иссиқ сув ҳамда иссиқлик энергияси билан таъминлаш тизимларини навбатдаги назоратдан ўтказиш ишлари олиб борилмоқда", — дейилади хабарда.
Ушбу тадбирларга маҳаллий ҳокимликлар вакиллари, Фавқулодда вазиятлар вазирлиги, Қурилиш ва уй-жой коммунал хўжалиги вазирлигининг ҳудудий бошқармалари каби ташкилотлар мутахассисларидан иборат ҳудудий ишчи гуруҳлари жалб этилган.
Идорга кўра, ўрганишлар давомида белгиланган талабларга жавоб бермайдиган айрим масжидлардаги иссиқ сув ҳамда иссиқлик энергияси билан таъминлашдаги камчиликлар қисқа муддатларда бартараф этилиб, иссиқлик ва табиий газ таъминоти қайта тикланмоқда.
"Ўз навбатида, мўмин-мусулмонлар ҳам мана шундай профилактик тадбирларни тўғри тушуниб, олиб борилаётган ишларда ҳамжиҳат бўлишларини сўраймиз", — дейилади хабарда.
Эслатиб ўтамиз, 31 март куни куни соат 12:19 да Андижон вилояти Избоскан тумани Мирзо Улуғбек маҳалласидаги бинода газ-ҳаво аралашмаси портлаши содир бўлганди. Ҳодиса оқибатида 3 киши ҳалок бўлди, 10 киши жароҳат олган.
