Кеча, 3 апрель куни Россия армияси яна Украинанинг йирик шаҳарларига дронлар билан зарба берди. Ҳужум оқибатида 4 киши ҳалок бўлди. Бу ҳақда Харьков мэри Игорь Терехов маълум қилди.
Билдирилишича, Новобаварск туманида олти дона камикадзе дрони қайд этилиб, улар тураржой биноларига, жумладан кўп қаватли уйларга урилган.
“Жуда кўп вайронагарчиликлар бор. Тахминан 30 та кўп қаватли уй зарар кўрган. Барча дронлар жуда зич жойга, бир неча километр радиус ичида тушган. Бу ҳудудда катта тураржой массиви жойлашган”, деди Харьков вилоят прокуратураси вакили Дмитрий Чубенко.
Уйлардан биридаги бутунлай қулаб тушган подезд остида одамлар қолган. Тураржой биноларида ёнғинлар ҳам юз берган. Тереховнинг сўзларига кўра, ҳужум оқибатида тўрт киши ҳалок бўлган, яна 35 киши тан жароҳати олган.
Шунингдек, 4 апрелга ўтар кечаси Россиянинг камикадзе дронлари Днепр шаҳрини нишонга олган. Бу ҳақда Днепропетровск вилояти ҳарбий маъмурияти раҳбари Сергей Лисак маълум қилди. Ҳужум оқибатида ёнғинлар юз берган, бир нечта маъмурий бино зарар кўрган.
“Дастлабки маълумотларга кўра, икки киши жабрланган. Улар жойида тиббий ёрдам олди”, деди Лисак.
Дронлар ҳужуми пойтахт Киевга ҳам етиб борган – Броварский туманида бир киши жароҳат олган.
“Эркак шифохонага ётқизилган. Дастлабки маълумотларга кўра, оёғи ва бўйнидан жароҳат олган”, деди Киев вилояти ҳарбий маъмурияти раҳбари Николай Калашник.
Шунингдек, тўртта юк машинаси ва битта енгил автомобиль ёниб кетган. Автосалон биносида ҳам ёнғин чиққан.
Россиянинг дрон ҳужумлари нишонига айланган яна бир шаҳар Запорожье бўлди. Вилоят ҳарбий маъмурияти раҳбари Иван Федеровнинг сўзларига кўра, шаҳарга камида еттита дрон ҳужум қилган, оқибатда бир киши жабрланган. Омбор биноси зарар кўрган, нотурар бинолардан бирида ёнғин чиққан.
