Бугундан Трампнинг можароли тарифлари кучга кирди. Шунингдек, Хитойга нисбатан божхона тўловлари 104 фоизгача оширилди.
Бугун, 9 апрель куни АҚШ президенти Дональд Трамп томонидан эълон қилинган янги тарифлар кучга кирди. Бу тарифлар АҚШга импорт қилинадиган маҳсулотларга нисбатан жорий этилган бўлиб, дунёнинг тахминан 90 та мамлакатига таъсир кўрсатади.
Трамп 2 апрель куни "Озодлик куни" деб эълон қилган нутқида, 5 апрелдан бошлаб барча импорт учун 10 фоизлик умумий тариф жорий этилишини ва айрим давлатлар учун 9 апрелдан бошлаб юқори тарифлар амалга оширилишини маълум қилди.
Бу янги тарифлар жаҳон иқтисодиётига салбий таъсир кўрсатди. Япониянинг Nikkei 225 индекси қарийб 4%га пасайди, Тайваннинг Taiex индекси эса 5.8%га тушди. Европа бозорлари ҳам йўқотишларга учради: Германиянинг DAX, Франциянинг CAC 40 ва Буюк Британиянинг FTSE 100 индекслари тахминан 2%га камайди.
Бунга жавобан нефть нархлари ҳам тушиб кетди; Brent маркали нефтнинг бир баррели нархи 60 доллардан ошди.
Шунингдек, Хитойга нисбатан тарифлар 104 фоизга етказилди. Бу қарор Хитойнинг АҚШ маҳсулотларига нисбатан жорий этган 34 фоизлик жавоб тарифларига жавобан қабул қилинди. Оқ уй матбуот котиби Кэролайн Ливиттнинг таъкидлашича, Пекин жавоб чораларини кўргани учун АҚШ янада кучлироқ жавоб қайтаради.
Дональд Трамп Хитойдан келтириладиган товарларга 50 фоиз ва 34 фоизлик божларни бир вақтнинг ўзида жорий этиш таҳдидидан воз кечмади. Илгари жорий этилган тўловлар билан биргаликда, ушбу божлар 9 апрель чоршанба кунидан бошлаб умумий 104 фоизни ташкил қилди.
Оқ уй матбуот котибаси Кэролайн Ливиттнинг маълум қилишича, АҚШ президенти Дональд Трамп ушбу чораларни кечиктиришдан бош тортди.
Хитой импортига нисбатан жорий этилган махсус савдо тўловлари энди умумий ҳисобда 104 фоизни ташкил қилмоқда. Ливиттнинг сўзларига кўра, Пекин жавоб чоралари кўргани хатолик бўлди, "чунки Америкага ҳужум қилинса, у ҳар доим кучлироқ жавоб қайтаради".
Трампнинг фикрича, Вашингтон ва Пекин келишувга эришишни хоҳламоқда, аммо буни қандай амалга оширишни билишмаяпти. Ливиттга кўра, Трамп “Хитой унга қўл чўзса, у меҳр-шафқат кўрсатишга тайёр”, деб таъкидлаган ва Пекиндан телефон қўнғироғи кутаётганини қўшимча қилган.
Таъкидлаш лозим, Трамп бир кун олдин Хитой билан божхона масалалари юзасидан кейинги музокараларни истисно қилган ва агар Пекин 8 апрелгача АҚШ товарларига жорий этган 34 фоизлик жавоб тўловларини бекор қилмаса, 9 апрелдан бошлаб Хитойдан импортга 50 фоизлик божлар кучга киришини айтган эди.
Абдуллоҳ Саййид
