Қозоғистоннинг Жетису вилоятида болага нисбатан зўравонлик ишлатиб, у билан жинсий алоқада бўлган эркак умрбод қамоқ жазосига ҳукм қилинди. Бу ҳақда Жетису вилояти прокуратураси хабар берди.
Маълум қилинишича, 2024 йилнинг август ойида эркак 12 ёшли қиз жойлашган уйга бостириб кириб, зўравонлик ишлатган ҳолда у билан жинсий алоқада бўлган. Ўша куни у ушланиб, ҳибсга олинган. Эркак шаҳвоний характердаги зўравонлик ҳаракатларини содир этганликда (Қозоғистон Жиноят кодексининг 121-моддаси 4-қисми) айбланган. Аммо Жиноят ишлари бўйича Жетису вилоятининг туманлараро ихтисослаштирилган суди судланувчининг ҳаракатини жинсий дахлсизликка қарши жиноятга уриниш сифатида қайта баҳолаган ва уни атиги 15 йилга озодликдан маҳрум қилган.
Билдирилишича, прокуратура органларининг изчил ва принципиал позицияси натижасида ушбу ҳукм апелляция инстанцияси томонидан ўзгартирилиб, айбдорга умрбод қамоқ жазоси тайинланган. Ҳукм қонуний кучга кирган.
