БМТ Қочқинлар ишлари бўйича Олий комиссарияти (УНҲСР) Украинадаги янги кўчирилган шахсларга кўрсатилаётган ёрдамни қисқартирганини маълум қилди, дея хабар бермоқда zamon.uz.
Ташкилот вакили Каролина Линдҳолм Биллингнинг таъкидлашича, бу қарор АҚШ томонидан молиявий ёрдам тўхтатилгани ва умумий донорлар сонининг камайгани туфайли қабул қилинган.
Қисқартириш психосоциал ёрдам кўрсатиш, вақтинчалик турар-жой қурилиши учун материаллар тақдим этиш ва пул шаклидаги ёрдамни ўз ичига олади.
БМТ Қочқинлар агентлиги Россиянинг кенг кўламли босқини бошланганидан буён 450 мингга яқин кишига ёрдам кўрсатиб келган ва 2024 йилда ўз маблағларининг 40 фоизини АҚШдан олган эди.
Жорий йил бошидан бери Украинанинг Павлоград ва Суми шаҳарларидаги транзит марказлар орқали деярли 7 700 киши кийим-кечак, гигиена воситалари, шунингдек, ҳуқуқий ва психосоциал ёрдам олган.
"Улар деярли ҳеч нарсасиз ва чуқур руҳий жароҳатлар билан келмоқда", — деди Биллинг.
БМТ вакиллари таъкидлаганидек, зарур молиявий ёрдам кўрсатилса, ташкилот ва унинг ҳамкорлари самарали ёрдам кўрсатишда етарли салоҳият ва имкониятларга эга.
