Туркиянинг 42 вилоятида FETÖ билан алоқадорликда гумон қилинган 169 киши қўлга олинди.
Туркия ички ишлар вазири Али Ерликаянинг маълум қилишича, мамлакатнинг 42 та вилоятида ўтказилган махсус операциялар натижасида FETÖ (Фатҳуллоҳчи террор ташкилоти) билан алоқадор бўлиши мумкин бўлган 169 нафар шахс қўлга олинди. Операциялар давомида рўйхатдан ўтмаган тўппончалар, милтиқлар, катта миқдорда хорижий валюта ва турк лиралари, шунингдек, кўплаб ҳужжатлар ва рақамли маълумотлар мусодара қилинди.
Аввалроқ, Туркияда FETÖ'нинг яширин тармоғи фош этилгани ҳақида хабар берилган эди. Унда шифрланган чатлар ва хориждан молиялаштириш ҳолатлари аниқланган.
Истанбулда ўтказилган қарши-террор операцияси натижасида FETÖ ҳаракати аъзолари яширин алоқалар ва хорижий маблағларни қабул қилиш учун қўллаётган мураккаб тармоқ фош этилган. Прокуратура маълумотларига кўра, ташкилот аъзолари "Signal" зашифрланган мессенжерини "Об-ҳаво" номи остида яширганлар — хабарлар автоматик ўчириб юборилган, дастурга кириш эса парол билан ҳимояланган.
Тергов жараёнида маълум бўлишича, FETÖ'га алоқадор маҳкумларнинг оилаларига хориждан хайрия маблағлари юборилган. Шунингдек, ташкилот мафкуравий мезонлар асосида "шифрланган никоҳлар"ни ташкил қилган, яширин учрашувлар ўтказган ва ўз аъзоларини мамлакатдан қочишида ёрдам берган.
FETÖ ҳаракати 2016 йил 15 июлда Туркияда амалга оширилган давлат тўнтариши уриниши ортидан Туркия, Покистон ва Кўрфаз мамлакатлари томонидан террорчи ташкилот сифатида тан олинган. Ташкилот раҳбари Фатҳуллоҳ Гюлен 2024 йил 20 октябрда АҚШдаги шифохонада вафот этган эди.
Абдуллоҳ Саййид
