Жанубий Кореянинг миллий разведка хизмати чориа пайшанба куни парламент аъзоларига маълум қилишича, Россия томонида Украина кучларига қарши жангларда қатнашган тахминан 4700 нафар шимолий кореялик аскар ҳалок бўлган ёки яраланган.
Бу баҳолаш Шимолий Корея биринчи марта ўз ҳарбий хизматчиларини Россияга, ўтган йили Украинанинг кутилмаган ҳужуми натижасида йўқотилган Курск вилоятининг қисмларини қайта эгаллашда ёрдам бериш учун юборганини тасдиқлаганидан икки кун ўтиб эълон қилинди.
Ёпиқ эшиклар ортида ўтган парламент қўмитаси мажлисида Жанубий Корея Миллий разведка хизмати (NIS) маълум қилишича, Шимолий Корея Россия ва Украина фронтида 4700 нафар қурбон берган, улардан 600 нафари ҳалок бўлган. Бу ҳақда йиғилишда қатнашган депутат Ли Сон Квён маълум қилди.
Лининг айтишича, NIS январдан мартгача 2000 нафар яраланган шимолий кореялик аскар ҳаво ёки темир йўл орқали ватанига қайтарилганини билдирган. Ҳалок бўлган аскарлар Россияда кремация қилиниб, уларнинг куллари Шимолий Кореяга юборилган.
Январ ойида NIS 300 нафар шимолий кореялик аскар ҳалок бўлганини, яна 2700 нафари яраланганини маълум қилган эди. Ўтган ой Жанубий Корея армияси умумий жароҳатланган ва ҳалок бўлганлар сонини 4000 нафаргача оширган эди.
Душанба куни Шимолий Корея раҳбари Ким Чен Ин Россия қуролли кучлари билан ҳамкорликда “украин неонацист босқинчиларини йўқ қилиш ва Курск ҳудудини озод этиш” учун ўз аскарларини юборишга қарор қилганини эълон қилди. Россия президенти Владимир Путин бу учун Шимолий Кореяга миннатдорчилик билдириб, шимолий кореялик аскарларнинг қурбонликларини унутмасликка ваъда берди.
Ким ва Путиннинг таъкидлашича, Шимолий Корея аскарларининг юборилиши икки давлат ўртасидаги 2024 йилда имзоланган мудофаа шартномаси доирасида амалга оширилган бўлиб, ушбу келишув ҳар икки томоннинг ҳимояси учун ёрдам кўрсатишни талаб қилади. АҚШ, Жанубий Корея ва уларнинг ҳамкорлари Шимолий Корея Россияга катта миқдорда анъанавий қурол-яроғ етказиб бераётганини айтишмоқда. Улар Россиянинг бу ёрдам эвазига Шимолий Кореяга ҳарбий ва иқтисодий кўмак кўрсатаётганини гумон қилишмоқда.
АҚШ, Жанубий Корея ва Украина расмийларининг маълум қилишича, ўтган куз Шимолий Корея Россияга 10 000–12 000 нафар аскар юборган. Жанубий Корея армияси март ойида яна 3000 нафар қўшимча шимолий кореялик аскар жўнатилганини маълум қилган.
Чоршанба куниги маълумот бериш пайтида NIS вакили Ким Бён Кининг билдиришича, Россия Шимолий Кореяга ҳаво мудофаа ракеталари, электрон уруш ускуналари, дронлар ва разведка йўлга чиқариш технологияларини берган. Шунингдек, икки томонлама саноат ҳамкорлиги доирасида Россияга 15 000 нафар шимолий кореялик меҳнатчи юборилган. Унинг айтишича, Шимолий Корея Россияга юборган ракеталар ва артиллерия қуроллари қиймати миллиардлаб долларга тенг, бироқ Россия бу қуроллар учун Шимолий Кореяга нақд пул ўтказганига оид далил топилмаган.
Абдуллоҳ Саййид
