Исроил кучларининг Ғазо секторида йирик ҳужуми “яқин кунларда” бошланади. Бу ҳақда Исроил Бош вазири Биньямин Нетаньяху кеча, 13 май куни маълум қилди.
Унга кўра, ҳужумдан мақсад Исроилга ҳужум қилган ҲАМАС устидан тўлиқ ғалаба қозониш ва уларнинг қўлида қолган сўнгги гаровга олинганларни озод қилиш бўлиши керак.
Аввалроқ Нетаньяху яраланган резервчилар билан учрашувда Исроил яқин кунларда “кампанияни якунлаш” учун Ғазо секторига “тўлиқ куч билан” ҳужум бошлашига ваъда берган эди. Унинг сўзларига кўра, ҲАМАС яна гаровга олинганларни озод қилишни таклиф қилган тақдирда ҳам Исроил урушни тугатишга рози бўлмайди.
“Вақтинчалик сулҳга эришиш мумкин, аммо узоқ муддатли урушни тугатиш мумкин эмас”, деди Исроил Бош вазири.
Бирлашган Миллатлар Ташкилотининг Фавқулодда ёрдам координатори Том Флетчер Исроилнинг Ғазодаги ҳаракатларини танқид қилиб, “Исроил босиб олинган Фаластин ҳудудидаги тинч аҳолига атайлаб ва уялмасдан ғайриинсоний шартлар қўйаётгани”ни айтди.
Флетчернинг айтишича, инсонпарварлик ёрдами етишмаслиги Ғазо секторидаги барча 2,1 миллион кишини кенг кўламли очарчилик хавфи остида қолдирди.
“Ўн ҳафтадан кўпроқ вақт давомида Ғазога ҳеч нарса етиб бормади – на озиқ-овқат, на дори-дармон, на сув, на чодир”, деди БМТнинг фавқулодда ёрдам координатори.
У Исроил ҳукуматини “тинч аҳолини ўлдириш ва ярадор қилишни тўхтатишга”, “бу шафқатсиз блокадани” тугатишга ва гуманитар ходимларнинг ҳаётини сақлаб қолишга имкон беришга чақирди.
Шу билан бирга, Флетчер ҲАМАС ва бошқа Фаластин қуролли гуруҳларига мурожаат қилиб, “барча гаровга олинганларни зудлик билан ва сўзсиз озод қилишга, ҳарбий амалиётлар чоғида тинч аҳолини хавф остига қўймасликка” чақирди.
Аввалроқ Франция Президенти Эммануэль Макрон ҳам Исроилнинг Ғазо секторидаги ҳаракатларини танқид қилганди.
Ўз навбатида, Германия федерал Президенти Франк-Вальтер Штайнмайер Биньямин Нетаньяху билан Қуддусда бўлиб ўтган учрашувда “тинч аҳолига зудлик билан инсонпарварлик ёрдамини етказиш зарурлигини таъкидлаган”.
Исроил матбуоти хабарларига кўра, Исроилнинг Ғазо секторида янги ҳужуми бошланишини АҚШ Президенти Дональд Трампнинг 13 май куни Саудия Арабистонида бошланган ва Қатар ва БААга ташрифини ўз ичига олган Форс кўрфази минтақасига уч кунлик ташрифи якунланишидан олдин кутмаслик керак.
