Кадастр агентлиги фуқароларни ер олиб бериш билан боғлиқ ҳолатларда алданиб қолмасликка чақирди. Бу ҳақда агентликнинг тегишли баёноти эълон қилинди.
Маълум қилинишича, сўнгги пайтларда “Ер олиб бераман” ёки “Ер майдонининг тоифасини ўзгартириб бераман” деган сохта ваъдалар орқали фирибгарлик қилаётган собиқ ёки амалдаги кадастр ходимлари учрамоқда ҳамда уларнинг аксарияти ҳуқуқни муҳофаза қилувчи органлар томонидан қўлга олинмоқда.
“Шуни қатъий равишда маълум қиламизки, нафақат ҳудудий бошқарма ва тизим ташкилотлари, ҳатто Кадастр агентлиги раҳбариятида ҳам бундай ваколат йўқ”, дейилади хабарда.
Шунингдек, агентликнинг қўшимча қилишича, жараённи ҳеч бир шахс ёки муассаса “пул эвазига” бажара олмайди ва бу қонун билан қатъий тартибга солинган.
- 1. Уй-жой қуриш ва тадбиркорлик мақсадлари учун ер майдонлари онлайн аукцион орқали очиқ савдога қўйилади;
- 2. Ернинг тоифасини ўзгартириш фақат Президент рухсати билан амалга оширилади.
Қўшимча қилинишича, ер тоифаси ўзгартирилган тақдирда ҳам ушбу ер давлат захирасига олинади ва қайта реализация қилинади.
“Шундай экан, сизлардан собиқ ёки амалдаги кадастр ходимларининг ҳар қандай шубҳали таклифлари юзасидан ҳуқуқни муҳофаза қилувчи органларга ёки Кадастр агентлигининг 1097 қисқа рақамига мурожаат қилишингизни сўраймиз”, дейилади хабарда.
