"Times of Israel" нашрининг хабар беришича, Исроил разведкаси музокаралардан ижобий натижа чиқишига ишончсизлик билан қарайди ва ҳарбий вариантни жиддий кўриб чиқмоқда.
АҚШ ва Эрон ўртасидаги бешинчи ядровий музокаралар раунди Римда бўлиб ўтмоқда. Музокараларда Эроннинг уран бойитиш фаолияти асосий муаммо сифатида кўрилмоқда. АҚШ Эрондан уран бойитишни тўлиқ тўхтатишни талаб қилмоқда, Эрон эса буни миллий суверенитет масаласи сифатида кўриб, рад этмоқда. Эрон ҳозирда уранни 60% даражада бойитмоқда, бу эса қурол-яроқ даражасига яқинлашмоқда.
Эрон ташқи ишлар вазири Аббос Арағчи БМТ ва Халқаро атом энергияси агентлигига (МАГАТЭ) йўллаган мактубида, агар Исроил зарба берса, АҚШни ҳам масъул деб ҳисоблашини маълум қилди. Унинг сўзларига кўра, Эрон ядровий материалларни махфий жойларга кўчириш орқали ҳимоя чораларини кўради ва бу ҳақда МАГАТЭга кейинроқ хабар беради.
Исроил бош вазири Биньямин Нетаньяху Эроннинг ядровий қуролга эга бўлишига йўл қўймаслигини таъкидлаб, музокаралар муваффақиятсиз тугаса, ҳарбий чоралар кўрилишини билдирган. Унинг сўзларига кўра, Эроннинг ядровий дастурига қарши зарба бериш учун вақт оз қолган.
Музокаралар муваффақиятсиз тугаши минтақавий муаммоларни кучайтириши мумкин. Эроннинг ядровий дастурига қарши ҳарбий зарба нафақат Исроил ва Эрон ўртасидаги муносабатларга, балки бутун Яқин Шарқ минтақасидаги барқарорликка таҳдид солиши мумкин.
Халқаро ҳамжамият музокаралар орқали муаммоларни ҳал қилишга чақирмоқда. Бироқ, ҳарбий вариантнинг муҳокама қилиниши вазиятнинг жиддийлигини кўрсатмоқда. Яқин ҳафталардаги воқеалар Яқин Шарқдаги геосиёсий вазиятга катта таъсир кўрсатиши мумкин.
Абдуллоҳ Саййид
