Украина Мудофаа вазирлигининг Бош разведка бошқармаси (ГУР) раҳбари Кирилл Будановнинг баёнотига кўра, Россия ҳарбий асирлар ва ҳалок бўлганлар жасадларини алмашишда шартларни фақат ўзи белгилашга уринмоқда.
Будановга кўра, Москванинг “ахборий босими”га қарамасдан, Киев ҳали ҳам Истанбулда эришилган келишувларга содиқ қолмоқда. “Репатриатсия жараёни келаси ҳафтада бошланиши керак. Бу ҳақида масъул томонлар аллақачон сешанба куни огоҳлантирилган”, — дея таъкидлади Буданов.
Бироқ Россия томони бошқа позитсияда. Генерал-лейтенант Александр Зорин раҳбарлигидаги музокарачилар Киевни “жасадлар алмашинуви кечиктирилгани ҳақида расмий хабар бермаганликда” айбламоқда.
Шу билан бирга, Россия давлат ахборот воситалари Брянск вилоятидан олинган деб тахмин қилинаётган музлатгичли юк машиналарининг суратларини тарқатди. Уларнинг ичида — даъво қилинишича — украиналик ҳарбийлар жасадлари бўлган.
