Тошкентдан ва унга йўналган барча барча чартер рейслар "Тошкент-Шарқий" аэропортига кўчирилади. Бу ҳақда Uzbekistan Airways бошқаруви раиси Шуҳрат Худойқулов "Ўзбекистон 24" телеканалида берган интервьюсида маълум қилди.
"Бу аэропорт — республикамизда шу турдаги биринчи аэропорт, десам тўғри бўлади. Аэропорт ICAO III-А тоифасига киради. Бу дегани, аэропорт 24 соат, 365 кун хизмат қилади", — деди у.
Унинг таъкидлашича, Тошкент халқаро аэропортида ҳозирда 10 дан ортиқ чартер рейслар амалга оширилмоқда, ушбу чартер рейсларнинг барчаси кейинчалик айнан ушбу аэропортга кўчирилади.
Янги аэропорт Тошкент шаҳри ва Ўзбекистоннинг инвестицион жозибадорлигини ошириш, тадбиркорларни жалб қилишда муҳим роль ўйнаши таъкидланди. Худойқуловнинг сўзларига кўра, Президент ҳам бу инфратузилманинг бизнес авиацияга хизмат қилиши жиҳатига алоҳида урғу берган.
Бизнес терминал соатига 100 нафар йўловчига хизмат кўрсатиш имкониятига эга. "Бу аэропорт — биринчи бизнес авиация. Президент шу жиҳатга ҳам алоҳида аҳамият беришни таъкидлади", — деди Худойқулов.
Шунингдек, унинг айтишича, ноқулай об-ҳаво шароитида ҳам, масалан, туманли кунларда, самолётларни бошқа захира аэропортларга йўналтирилишига эҳтиёж қолмайди. "Бу аэропорт шундай пайтлар ҳам ҳар қандай рейсни қабул қила олади", — дея қайд этди Худойқулов.
Маълум қилинишича, янги аэропорт перронида бир вақтнинг ўзида 23 та катта ҳажмдаги Boeing 747 русумидаги самолётларни жойлаштириш мумкин. Худойқулов аэропорт яқинда фойдаланишга топширилишини айтди.
