Исроил расмийлари Эрон билан ҳарбий можарода аввалроқ АҚШ Президенти Дональд Трамп томонидан эълон қилинган ўт очишни тўхтатиш келишуви кучга кирганини тасдиқлади. Бу ҳақда бугун, 24 июнь куни эрталаб Исроил Бош вазири Биньямин Нетаньяхунинг идораси маълум қилди.
Баёнотга кўра, Нетаньяху ўз Вазирлар Маҳкамасига Исроил ўзининг барча ҳарбий мақсадларига эришганини маълум қилган. Унинг сўзларига кўра, Исроил Эрондан келаётган “иккиламчи экзистенциал таҳдид” – ядро дастури ва ракета салоҳиятини йўқ қилган.
Нетаньяху, шунингдек, Трампга мудофаадаги қўллаб-қувватлаши ва Эрон ядровий таҳдидини йўқ қилишдаги иштироки учун миннатдорлик билдирган. Шу билан бирга, Исроил раҳбарияти ўт очишни тўхтатиш бўйича келишувнинг ҳар қандай бузилишига “куч билан жавоб беришини” огоҳлантирди.
Бу баёнот Трампнинг Truth Social микроблогидаги янги постидан сўнг пайдо бўлди. У Эрон ва Исроил ўртасидаги ўт очишни тўхтатиш келишуви кучга кирганини ёзди.
“Оташкесим аллақачон кучга кирди. Илтимос, уни бузманг”, деди у.
Кечаси Трамп ҳарбий ҳаракатларни тўхтатиш босқичма-босқич амалга оширилишини тушунтирди: Эрон Исроилга ҳужумларни эрталаб соат 6:00 да тўхтатиши керак ва Исроил ҳам 12 соатдан кейин худди шундай йўл тутади. 24 соатлик муддатдан сўнг, Трампнинг сўзларига кўра, уруш “расмий равишда тугайди”.
Айни пайтда кечаси Эрон Ташқи ишлар вазири Аббос Ароқчи Трампнинг Исроил билан ўт очишни тўхтатиш бўйича келишувга эришгани ҳақидаги баёнотини рад этди. Шу билан бирга, у Х ижтимоий тармоғида 24 июнь куни эрталаб соат 4 га қадар Эрон ҳам ўз ҳарбий амалиётларини тўхтатса, Исроилга зарба беришни тўхтатишини ёзган.
“Теҳрон ҳарбий амалиётларни тўхтатиш бўйича якуний қарорни кейинроқ қабул қилади”, дея қўшимча қилди Ароқчи.
Трампнинг баёнотидан бир неча соат олдин Эрон армияси АҚШнинг Қатардаги Ал-Удейд базасига ҳужум қилди. Трамп бу ҳужумни Қўшма Штатлар томонидан Эрондаги ядровий иншоотларни йўқ қилишга қаратилган “заиф жавоб” деб атади.
22 июнга ўтар кечаси АҚШ Исроил ва Эрон ўртасида 13 июнда бошланган ҳарбий можарога кирди. Америка армияси Эрон ядровий дастурининг учта жойига зарба берди, шундан сўнг Трамп халққа мурожаатида Эроннинг уранни бойитиш бўйича энг муҳим иншоотлари йўқ қилинганини эълон қилди.
