Бу ҳақда 26 июнь куни Марказий банкнинг 2024 йилдаги фаолияти тўғрисидаги ҳисоботи эшитилган Сенат ялпи мажлисида регулятор раиси Тимур Ишметов маълум қилди.
Унинг қайд этишича, ўтган йилда олиб борилган назорат тадбирларида синов тариқасида тўртта банк намунаси асосида 14 та банкнинг риск профили баҳоланган. Унинг натижасида банкларга тегишли чоралар кўрилиб, заифликларни бартараф этиш топширилди. Қонунчилик талабларига риоя қилмаган банклар ва микромолия ташкилотларига нисбатан айрим операцияларни тўхтатиш ва жарима ундириш каби чоралар кўрилган.
Хусусан, валюта ва жиноий фаолиятдан олинган даромадларни легаллаштириш каби қонунбузарликлар учун 28 та банк ва 24 та микромолия ташкилотидан 16,6 млрд сўм (Марказий банк курси бўйича $1,31 млн) миқдорида жарима ундирилди.
Аҳолига ажратилган кредитларнинг таваккалчилик даражасини баҳолаш ва юзага келиши мумкин бўлган муаммоли кредитларни аниқлаш учун регулятор ипотека кредитлари, автокредитлар ва микроқарзларнинг сифат жиҳатидан даврий ўзгаришини ўрганмоқда ҳамда банкларнинг кредит портфели таркибини диверсификация қилиш чораларини белгилаб олди.
Бундан ташқари, микроқарзлар концентрацияси юқори бўлган банкларда ортиқча ресурслар кичик бизнесни молиялаштиришга йўналтирилади. Капитал монандлиги ҳисобида аҳолига ажратилган ипотека ва автокредитлар бўйича таваккалчилик даражалари қарз олувчининг қарз юки кўрсаткичи ва таъминотга нисбатида белгиланади.
