Туркия полицияси 30 июнь куни Муҳаммад пайғамбар ва Мусо алайҳиссаломни карикатура қилган 4 нафар шахсни ҳибсга олди. Бу ҳақда CNN маълум қилди.
Қайд этилишича, ҳибсга олинганлар LeMan сатирик журналининг карикатурачилари ва бош муҳаррири ҳисобланади. Уларнинг карикатурасида мусулмон ва яҳудий эркак қанот ҳамда бошида доирасимон нур билан акс этган. Улар уруш ва ракеталар фонида осмонда бир-бири билан қўл бериб саломлашаётгани тасвирланган.
Карикатура оммага тақдим қилинганидан 4 кун ўтиб ижтимоий тармоқларда кенг тарқалиб кетган. Юзлаб одамлар бунга норозилик сифатида Истанбулнинг асосий сайёҳлик кўчасига чиқиб, “Аллоҳ буюкдир” деб ҳайқириб, намойишлар ўтказган. Туркия ҳукумати ҳам журнални қоралаган.
Ички ишлар вазири Али Ерликая карикатурани “провокация” деб баҳолаган ва “бундай қилишга журъат этганлар қонун олдида жавоб бериши”ни айтган.
Туркия президенти маъмуриятининг алоқа бўлими бошлиғи Фаҳриддин Алтун карикатурани “эътиқод ва қадриятларимизга қабиҳ ҳужум” дея таъкидлаган.
Адлия вазирлиги ҳодиса юзасидан Жиноят кодексининг 216-моддаси “диний қадриятларни омма олдида ҳақорат қилиш” жинояти бўйича тергов бошланган.
Франциянинг Charlie Hebdo нашрига ўхшаш комикслари билан танилган LeMan сатира журнали ушбу карикатурада пайғамбарлар тасвирланмаганини айтиб, айбловларни рад этган.
“Бу Муҳаммад пайғамбар (с.а.в.)нинг карикатураси эмас. Суратда Муҳаммад исми Исроил бомбардимонларида ҳалок бўлган мусулмон кишига нисбатан қўлланган. Ислом оламида Муҳаммад исмли 200 миллиондан ортиқ киши бор. Карикатура ҳеч қандай тарзда Муҳаммад пайғамбарга ишора қилмайди. Ҳалок бўлган мусулмонни тасвирлаш орқали мазлум мусулмон халқининг ҳақлигини кўрсатиш мақсад қилинган. Диний қадриятларни камситиш нияти умуман йўқ эди. Бизга қўйилган даъвони рад этамиз. Пайғамбаримиз асарда тасвирланмаган”, — дейилади журнал баёнотида.
Шунингдек, журнал карикатура юзасидан мусулмонлардан кечирим сўраган. Ички ишлар вазирлиги карикатурачиларнинг ўз уйларида қўлга олингани ва оёқяланг кишанга солиб қўйилгани акс этган видеони оммага тақдим этган. Полиция уларга “хавфсизлик кучларидан ҳам, адолатдан ҳам қочиб қутула олмаслигини” таъкидлаган.
