Фарғона вилояти ИИБ Йўл ҳаракати хавфсизлиги бошқармаси бошлиғи подполковник Акмал Аҳмедов эгаллаб турган лавозимидан озод этилди. Бу ҳақда Фарғона вилояти ЙҲХБ матбуот хизмати хабар берди.
"Тизимни таъмагирлик, порахўрлик сингари иллатлардан тозалаш ишлари олиб борилаётган бир пайтда, бошқарма бошлиғи яқин қариндошига тегишли бўлган Malibu-2 автомашинасида содир этилган қоидабузарликларни қонунга зид равишда яширишга урингани фош этилган", дейилади хабарда.
Маълум қилинишича, ички ишлар вазирининг тегишли буйруғи билан подполковник Акмал Аҳмедов эгаллаб турган лавозимидан озод этилган. Ҳозирда мазкур қонунбузарликка тўлиқ ҳуқуқий баҳо бериш учун қўшимча суриштирув ҳаракатлари олиб борилмоқда.
Шунингдек, Malibu русумли 40 081 SBA давлат рақамли автотранспорт воситасида содир этилган барча қоидабузарликлар бўйича жарималар тўлиқ ундирилган.
