Бухоро вилоятининг Когон шаҳрида ўзаро жанжал оқибатида келинини пичоқлаб ўлдирган қайнота 7 йилга озодликдан маҳрум этилди. Бу ҳақда Олий суд матбуот котиби Азиз Обидов маълум қилди.
Қайд этилишича, 2024 йилнинг охирида содир бўлган қотиллик ҳолати юзасидан кўриб чиқилган суд ишига оид ҳукм жорий йилнинг июнь ойида ўқиб эшиттирилган.
Унга кўра, асли Тошкент вилоятида туғилган ва узоқ йиллардан буён Бухоро вилоятининг Когон шаҳрида яшаб келган 68 ёшли В.К.нинг айрим қўни-қўшнилари билан ҳам азалдан келишмовчилиги бўлган. У спиртли ичимликлар истеъмол қилиши туфайли ўз оиласи билан ҳам тез-тез жанжал ва келишмовчиликларга бориб турган. Хусусан, В.К. ўғли Д.К. билан бирга яшаб келаётган келини Д.И. билан ҳам ўзаро тортишиб қолган. Оғзаки тортишувдан сўнг келини подъезд ва йўлакларни тозалаш учун кўчага чиқиб кетган. Қайтиб келган келин эшикнинг ичкаридан қулфлаб қўйилганини кўриб, қайнотасидан уни очишини сўраган.
Бироқ қайнота қўполлик билан “қаердан келган бўлсанг ўша ерга кет”, дея бақирган. Келин бир муддат кўчадаги ўриндиқда қолиб кетган. Орадан вақт ўтиб, қайнота эшикни очиб, келинидан ичкарига киришини сўраган. Қайнота ичкарига кирган келин билан яна жанжаллаша бошлаган. Жаҳли чиққан келин қайнотасини итариб юбориб, уни ўқлов билан ура бошлаган. Спиртли ичимлик таъсирида бўлган қайнота ўзини ҳимоя қилиш учун ошхона пичоғини олиб, келинига ташланган. Пичоқ билан келинининг қорин ва қорин усти қисмига шафқатсизларча урган. Д.И. йиқилган ва судралган ҳолда кўчага чиқиб, қўни-қўшнилардан ёрдам сўраган.
Жабрланувчи тезкор тиббий ёрдам кўрсатилиши ва муолажалар олиб борилишига қарамай, шифохонада вафот этган. Қайнота суд-тергов жараёнларида қилмишидан пушаймонлигини, соғлиғининг ёмонлигини, нафақахўр эканини инобатга олиб, “адолатли” қарор чиқаришни сўраб кўрсатма берган.
Унга нисбатан Жиноят кодексининг 97-моддаси (қасддан одам ўлдириш) билан иш қўзғатилган. Судланувчи жиноят ишлари бўйича Когон шаҳар суди ҳукми билан 7 йил муддатга озодликдан маҳрум этилган.
