АҚШ собиқ президенти Жо Байден президентлик муддатининг охирида қабул қилинган барча қарорларини оғзаки тарзда маъқуллаганини билдирди.
"Мен барча қарорларни шахсан ўзим қабул қилганман", — деди Байден. Унинг айтишича, у айрим ҳужжатларни имзолашда ходимларига автоперодан фойдаланишни буюрган, чунки "гап жуда кўп қарорлар ҳақида борган".
2025 йил март ойида амалдаги президент Доналд Трамп Байден томонидан автоперо билан имзоланган афв этиш тўғрисидаги қарорлар ҳақиқий эмаслигини ва кучга эга эмаслигини айтганди. "Бошқача айтганда, Жо Байден уларни имзоламаган, бундан ҳам муҳими у мазкур ҳужжатлар ҳақида ҳеч нарсани билмаган!" — деган эди Трамп.
Reuters агентлигининг хабар беришича, июн ойида АҚШ Адлия вазирлиги Жо Байден томонидан имзоланган афв этишга доир қарорлар юзасидан тергов бошлаган. Мазкур тергов Байден ўша вақтда ақли расо бўлганми ва унинг ходимлари автоперо ёрдамида ҳужжатларни имзолаш имкониятидан суиистеъмол қилганми, йўқми шуни аниқлаши керак.
The New York Times'га кўра, Конгрессдаги республикачилар бу иш бўйича Оқ уйнинг собиқ ходимларини сўроққа чақирмоқчи. Уларнинг фикрича, Байден “муомалага лаёқатсиз” бўлган, унинг ўрнига қарорларни ходимлар автоперо ёрдамида қабул қилган.
Тергов доирасида АҚШ Миллий архиви Оқ уйнинг минглаб мактубларини Адлия вазирлигига топширган, уларда афв этишлар ҳам тилга олинган. The New York Times ўнлаб хатларнинг парчаларини ўрганиб чиққан ва уларда Байден оғзаки тарзда афв этишларга розилик бергани ҳақида ёзилган. Бироқ газета собиқ президент ҳужжатларнинг фақат бир қисмини кўрганини ёзмоқда.
Байден президентлик муддатининг охирида деярли тўрт минг нафар маҳкумнинг жазоларини енгиллаштирган ва Трамп маъмурияти томонидан таъқибга учраши мумкин бўлганларни олдиндан афв этган. У уч ой давомида афв бўйича тўртта пакетни маъқуллаган, уларнинг барчаси автоперо орқали имзоланган.
Автоперо — бу автоматик имзо қўйиш қурилмаси бўлиб, ундан Қўшма Штатларнинг бошқа президентлари, жумладан, Барак Обама ҳам фойдаланган.
