Жорий йил 16 июль куни Қашқадарё вилояти Кўкдала туманида газ "заправка" портлаши оқибатида тўрт киши ҳалок бўлган. Маълумотларга кўра, фожиада вафот этган ва жароҳатларганларга товон пуллари тўлаб берилмоқда.
Кўкдаладаги портлашда ҳалок бўлган тўрт нафар фуқаро оила аъзоларига 100 миллион сўмдан компенсация тўлаб берилмоқда. Шунингдек, турли даражада тан жароҳати олган 15 нафар фуқарога 50 миллион сўмдан моддий ёрдам кўрсатилмоқда. Бу ҳақда туман ҳокимлиги ахборот хизмати маълум қилган.
Аниқланишича, газ тўлдириш станцияси раҳбари ҳам ёнғин оқибатида вафот этган. Портлаш натижасида шохобча ҳовлисидаги контейнерлардан бири ресторан ҳудудига учиб тушган ва натижада ресторанда ҳам ёнғин бошланган. У ерда ҳам вафот этганлар бор.
16 июль куни Кўкдала тумани тиббиёт бирлашмасига куйиш тан жароҳатлари билан етти нафар бемор шифохонага келтирилган. Улардан икки нафарининг ҳолати оғир ва реанимацияга ётқизилган. Беш нафари турли даражадаги тан жароҳатлари билан мурожаат қилган. Керакли тиббиёт мутахассислари жалб этилган. Маълум бўлишича, шифохонадаги беморларнинг барчаси станцияда ишловчи ходимлар бўлган.
Газ заправкадаги портлаш юзасидан жиноят иши қўзғатилган. Жиноят иши доирасида суд-тиббий, ёнғин келиб чиқишини аниқлаш бўйича суд-кимёвий, биология, криминалистика ва ёнғин техникавий экспертизалари тайинланган.
