Тошкент шаҳри Сергели тумани қўриқлаш хизматининг навбатчилик қисмига Чоштепа кўчасида жойлашган ташвиш сигнали келиб тушди. Воқеа жойига зудлик билан тезкор ҳаракатланувчи гуруҳ ходимлари етиб бориб, ҳолатни ўрганган.
Аниқланишича, юзига ниқоб таққан шахс дўконнинг том қисмини бузиб кириб, ўғирлик содир этган. Тезкор гуруҳ ходимлари томонидан гумонланувчи 3 та оқ целлофан пакетда 200 қути тамаки маҳсулотларини олиб тушаётган вақтида ашёвий далиллар билан ушланган.
Дўкон эгаси аввал ҳам ушбу дўконда ўғирлик содир этилганлигини маълум қилди.
“Мен савдо билан шуғулланаман. Бундан аввал ҳам дўконда 2 марта ўғирлик содир бўлган эди. Биринчи ўғирликдан сўнг, кузатув камераларини ўрнатдик, лекин иккинчи бор ўғирликка тушган одамларнинг юзида ниқоби ва қўлқопи борлиги учун уларнинг шахсини аниқлай олмадик. Шундан сўнг, мен дўконни қўриқлаш пультига улатдим. Оқибатда ходимларнинг тезкор ҳаракатлари билан ўғрилар бу сафар қочишга ҳам улгурмади”,- дейди дўкон эгаси.
Воқеа жойидан топилган барча ашёвий далиллар қонунан тартибда расмийлаштирилган.
Ҳозирда мазкур ҳолат юзасидан ЖКнинг 169-моддаси билан жиноят иши қўзғатилиб, тергов ҳаракатлари олиб борилмоқда.
