23 июль куни икки давлат ўртасида асирлар алмашинувининг тўққизинчи босқичи бўлиб ўтди. Бу гал ҳар икки томондан 250 нафардан ортиқ ҳарбийлар уйига қайтарилди.
Украина Президенти Владимир Зеленскийнинг маълум қилишича, Истанбулда 2 июнь куни бўлиб ўтган музокаралар натижасида келишилган ушбу ташаббус доирасида 3 йилдан ортиқ Россияда асирликда бўлган аскарлар ҳам ватанига қайтарилган. “Минглаб оилалар ўз яқинларини қучоқлаш имконига эга бўлди”, — деди Зеленский.
Россия делегацияси раҳбари Владимир Мединский ҳам асирлар алмашинувини тасдиқлади. Унга кўра, сўнгги босқичда Украина—Беларус чегарасида 250 нафардан ортиқ ҳарбийлар алмашилган. Шу билан умумий ҳисобда 1 200 дан ортиқ аскар қайтарилган.
Россия Мудофаа вазирлиги Беларусга етказилган россиялик ҳарбийларга тиббий ва психологик ёрдам кўрсатилаётганини билдирди.
Зеленский шунингдек, Истанбулда Украина ва Россия ўртасидаги тинчлик музокараларининг янги босқичи бошланганини айтиб, август охиригача президентлар даражасида учрашув ўтказишни таклиф қилганини ҳам қўшимча қилган.
