Қирғизистонда халқаро интернет-трафик бўйича бир йиллик давлат монополияси жорий қилинди. Президент Садир Жапаров тегишли фармонни имзолади.
2025 йил 15 августдан 2026 йил 14 августгача барча халқаро трафик фақат миллийлаштирилган “ЭлКат” компанияси орқали амалга оширилади. Бошқа операторлар икки ой ичида барча шартномаларни шу компанияга топшириши керак бўлади.
Рақамли ривожланиш вазирлиги бу қадам нархлар барқарорлигига ва иқтисодий рақамлаштиришга хизмат қилишини таъкидлади. Аммо қандай механизмлар орқали амалга оширилиши очиқланмади.
Бунгача Қирғизистон Телеком операторлари ассоциацияси бу режани танқид қилган, уни Конституцияга зид ва рақобат қонунини бузувчи деб атаган эди.
