Украинада 33 давлат фуқаролари ҳарбий асирликда сақланмоқда, уларнинг энг кўпи Ўзбекистондан — “Хочу жить” лойиҳаси.
2025 йилда Россия камида 902 нафар Ўзбекистон фуқаросини урушга ёллашга муваффақ бўлди. Бу ҳақда россиялик ҳарбийларнинг ихтиёрий равишда асирга тушишига кўмаклашувчи Украинанинг “Хочу жить” (“Яшашни истайман”) давлат лойиҳаси хабар берди.
"Биз Ўзбекистондан келган ёлланма аскарлар рўйхати (1110 нафар)ни эълон қилганимиздан сўнг мамлакатда фуқароларнинг жанговар ҳаракатларда иштироки ҳақидаги маълумотларни текшириш бошланди, бироқ, ёлланма аскарларни жиноий таъқиб қилиш кучайганига қарамай, Россия уларни ёллаш бўйича саъй-ҳаракатларни кучайтиришда давом этмоқда", дея қайд этди лойиҳа.
Унга кўра, ёллаш кўпинча шантаж ва алдовлар орқали содир этилади, айниқса, яқинда Россия фуқаролигини олган мигрантларга нисбатан. “Натижада бугун Украинада 33 давлат фуқаролари асирликда сақланмоқда. Хорижий ҳарбий асирлар сони бўйича Ўзбекистон биринчи ўринда туради”, дейилади баёнотда.
“Хочу жить”, шунингдек, Россия қамоқхоналарида жазо муддатини ўтаётганлар таҳдид ва руҳий босим орқали урушга жалб қилинаётганини қўшимча қилди.
