Италиянинг Пиедмонт округида бир йилга яқин вақт давомида бедарак йўқолган 64 ёшли Шифокор Никола Ивалдонинг жасади сунъий интеллект ёрдамида топилди. Бу ҳақда NDTV хабар берди.
Билдирилишича, Италия Миллий Алп ва Ғор қутқарув хизмати 1 йил давомида Никола Ивалдони қидирув ишларини олиб борган. Аммо натижа бўлмагач, замонавий дронлар жалб этилган.
2 та дрон 29 июль куни 5 соат мобайнида Пиедмонт округидаги ўрмон ҳудудларини кузатган. Сўнгра қутқарувчилар бу тасвирларни СИга юклаган ва натижада дарҳол “шубҳали нуқталар” аниқланган.
Ёмғир ва туман сабаб қутқарув ишлари кечиккан бўлса-да, 31 июль куни жасад мутахасислар ва дронлар ёрдамида топилган. Қутқарувчилар фикрича, суратларни уларнинг ўзлари таҳлил қилганида бу жараён ҳафталар ёки ойларга чўзилиши мумкин эди.
