Таъкидланишича, 7 саҳифадан иборат ҳужжат июль ойида БМТ бош қароргоҳида Саудия Арабистони ва Франция томонидан ташкил этилган халқаро конференцияда тайёрланган.
142 давлат ҳужжатни қўллаб-қувватловчи резолюцияни ёқлаб овоз берган. Исроил, Аргентина, Венгрия, Микронезия, Науру, Палау, Папуа-Янги Гвинея, Парагвай, Тонга ва АҚШ қарши овоз берди, 12 давлат эса бетараф қолди.
Овоз беришдан олдин Франциянинг БМТдаги доимий вакили Жером Боннафонт “Нью-Йорк декларацияси”да “икки давлат ечимини таъминлаш бўйича ягона “йўл харитаси” белгиланганини эслатди.
Бу Ғазода зудлик билан ўт очишни тўхтатиш, у ердаги барча гаровга олинганларни озод қилиш ва суверен Фаластин давлатини барпо этишни ўз ичига олади.
“Йўл харитаси”да яна ҲАМАСни қуролсизлантириш ва уни Ғазодаги бошқарувдан четлаштириш, Исроил ва араб давлатлари ўртасидаги муносабатларни нормаллаштириш, шунингдек, жамоавий хавфсизлик кафолатлари талаб қилинади.
БМТ Бош котиби Антониу Гутерриш сессиянинг очилиш маросимида сўзлаган нутқида “Яқин Шарқ тинчлигининг асосий ечими — Исроил ва Фаластин ўртасидаги зиддиятни адолатли ва икки томон манфаатларини инобатга олган ҳолда ҳал этишдир” деб таъкидлади.
