“Ўзгидромет” маълумотларига кўра, ҳафтанинг иккинчи ярмидан бошлаб Ўзбекистон ҳудудида ҳаво ҳарорати аста-секин пасаяди. Айрим ҳудудларда қисқа муддатли ёмғир ва момақалдироқ кузатилиши мумкин.
1 июнь куни кундузи республика ҳудудининг катта қисмида қуруқ об-ҳаво сақланиб туради. Фақат Тошкент вилоятининг айрим жойлари ва Фарғона водийси вилоятларида қисқа муддатли ёмғир ёғиши, момақалдироқ бўлиши мумкин. Ҳаво ҳарорати 34-36 даража, жанубда эса 38-40 даражагача етади.
2—4 июнь кунлари республика бўйича ёз фаслининг боши учун хос бўлган об-ҳаво кузатилиши прогноз қилинмоқда. Кечаси ва куннинг биринчи ярмида асосан кам булутли об-ҳаво бўлади. Куннинг иккинчи ярмида эса конвектив булутлар ривожланиб, айрим ҳудудларда қисқа муддатли ёмғир ва момақалдироқ кузатилиши мумкин.
Шу кунларда ҳаво ҳарорати аста-секин 28-33 даражагача, жанубий ҳудудларда эса 34-37 даражагача пасаяди.
5 июнь куни фақат Фарғона водийсининг айрим жойларида қисқа муддатли ёмғир ва момақалдироқ бўлиши мумкин. Ҳаво ҳарорати деярли ўзгармайди.
Шамол тезлиги 7-12 метр/сонияни ташкил этади, баъзи жойларда 15-20 метр/сониягача кучайиши, айрим ҳудудларда эса чанг-тўзон кузатилиши мумкин.
Тоғолди ва тоғли ҳудудларда 1—5 июнь кунлари айрим жойларда қисқа муддатли ёмғир ёғиши, момақалдироқ кузатилиши кутилмоқда. Шунингдек, сел-сув тошқин ҳодисалари юзага келиши мумкин.
Тошкент шаҳрида 1 июнь куни қисқа муддатли ёмғир ва момақалдироқ бўлиши эҳтимоли бор. Ҳаво ҳарорати 34-36 даража атрофида бўлади. 2—4 июнь кунлари куннинг иккинчи ярмида қисқа муддатли ёмғир ёғиши мумкин, ҳарорат эса аста-секин 29-31 даражагача пасаяди. 5 июнь куни ёғингарчилик кутилмаяпти, кундузи ҳаво 31-33 даража бўлади.
