Бухоро вилоятида икки аёл эркакни ишқий ёзишмалар орқали шантаж қилиб, пул талаб қилгани аниқланди. Ҳуқуқ-тартибот идоралари ходимлари Бухоро вилоятининг Вобкент туманида товламачилик ҳолатининг олдини олди, деб хабар бермоқда ИИВ матбуот хизмати.
Маълумотларга кўра, 35 ёшли аёл ва эркак ўртасидаги ёзишмаларни унинг 19 ёшли дугонаси кўриб қолган ва уларни ошкор қилиш билан таҳдид қила бошлаган. Дастлаб аёл дугонасига жим туриши учун пул берган, кейинчалик эса у билан жиноий тил бириктирган.
Аёл эркакни оиласини бузиш билан қўрқитиб, 6,8 млн сўм талаб қилган. Тезкор тадбир давомида гумонланувчи 100 доллар ва 5,6 млн сўм олаётганда ушланган.
Мазкур ҳолат юзасидан ЖКнинг 165-моддаси 2-қисми "в" банди билан жиноят иши қўзғатилиб, тергов ҳаракатлари ўтказилмоқда.
