Қозоғистон фуқароси Тошкентга автомобиль харид қилиш мақсадида келиб, метро орқали ҳаракатланаётганда 10 минг АҚШ долларини йўқотиб қўйган. Маблағ метрополитен ходимлари томонидан топилиб, эгасига қайтарилди.
Маълум бўлишича, фуқаро Олмазор метро бекатидан Сергели йўналиши бўйлаб ҳаракатланган. Унинг сўзларига кўра, Сергелига етиб келганида сумкасидаги пакетдан 10 минг доллар тушиб қолган. У пул йўқолганини автомобиль бозорига борганидан кейин сезган.
Кейинчалик мазкур маблағ метрополитенда хавфсизликни таъминлаш бошқармаси ходими томонидан топиб олинган.
Ички ишлар органлари ходимлари зарур текширув ва аниқлаш ишларини олиб бориб, пулнинг қонуний эгасини Face ID орқали аниқлаган.
Натижада 10 минг АҚШ доллари белгиланган тартибда эгасига тўлиқ қайтариб берилган.
Қозоғистон фуқароси ички ишлар ва метро ходимларига миннатдорлик билдириб, уларнинг тезкор ҳаракатларини алоҳида таъкидлаган.
