Ўзбекистоннинг халқаро олтин-валюта захиралари қиймати июнь ойида 6,8 миллиард долларга ёки 9,6 фоизга камайди. Бу ҳақда Марказий банк маълумотларида келтирилди.
Маълум қилинишича, 2026 йил 1 июль ҳолатига кўра, мамлакатнинг халқаро захиралари 63,7 миллиард долларни ташкил этган. Бу кўрсаткич 1 июнь ҳолатига нисбатан 6,8 миллиард долларга кам.
Захираларнинг энг катта қисми анъанавий равишда олтин ҳиссасига тўғри келади. Июль ойи бошида олтин захираларининг қиймати 55,75 миллиард долларга баҳоланган. Бир ой аввал ушбу кўрсаткич 61,4 миллиард долларни ташкил этган. Марказий банк маълумотларига кўра, халқаро захиралар қийматининг пасайишига асосан жаҳон бозорида олтин нархининг арзонлашиши сабаб бўлган.
Шунга қарамай, мамлакат захирасидаги олтин ҳажми ўсишда давом этган. Хусусан, 1 июль ҳолатига кўра, Марказий банк омборларидаги олтин захираси 13,9 миллион трой унцияга ёки тахминан 432 тоннага етган. Бу кўрсаткич бир ой аввал 13,6 миллион трой унцияни, 2025 йилнинг 1 июль ҳолатига эса 11,7 миллион трой унцияни ташкил этган.
Шундай қилиб, сўнгги бир йил давомида мамлакатнинг олтин захираси ҳажми 2,2 миллион трой унцияга ёки 68,4 тоннага ошган.
Шунингдек, июль ойи бошида халқаро захиралар таркибидаги хорижий валюта активлари 7,44 миллиард долларни ташкил этган. Бу кўрсаткич июнь ойи бошида 8,57 миллиард доллар бўлган. Демак, бир ой ичида валюта активлари ҳажми 1,1 миллиард долларга қисқарган.
Эслатиб ўтамиз, аввалроқ жорий йилнинг январь—май ойларида Ўзбекистоннинг олтин экспорти ўтган йилнинг шу даврига нисбатан 4,3 бараварга камайгани хабар қилинган эди. Марказий банк ушбу беш ой давомида фақат апрель ойида 1,5 миллиард долларлик олтин экспорт қилган. Таққослаш учун, 2025 йилнинг дастлабки беш ойида мамлакат 6,5 миллиард долларлик олтинни ташқи бозорга сотган эди.
