Россия Президенти Владимир Путин яқин ойларда Украинага қарши ҳарбий ҳаракатларни янада кучайтиришни режалаштираётган бўлиши мумкин. Бу ҳақда Reuters агентлиги ўз манбаларига таяниб хабар берди.
Агентлик маълумотига кўра, Украинанинг сўнгги вақтларда Россия ҳудудидаги нефтьни қайта ишлаш заводлари ва портларга амалга оширган дрон ҳужумлари Кремлнинг урушни давом эттириш борасидаги қатъиятини янада кучайтирган. Нашр суҳбатлашган, исми сир сақланган манбалардан бири яқин ойларда фронтдаги вазият янада кескинлашиши эҳтимоли юқори эканини билдирган.
Манбаларнинг таъкидлашича, Путин Донбасснинг ҳали ҳам Украина назорати остида бўлиб турган ҳудудларини эгаллашни урушнинг асосий стратегик мақсади сифатида кўрмоқда. Шу билан бирга, у Россия армияси яқин вақт ичида Донбасс устидан тўлиқ назорат ўрнатиши мумкинлигига ишонмоқда.
Бу маълумотлар АҚШ Президенти Дональд Трампнинг 7 июль куни Путин урушни тугатишни истаётгани ва можарони ҳал этиш кўпчилик ўйлагандан ҳам яқин эканини айтган баёноти ортидан янгради.
Кремль матбуот котиби Дмитрий Песков Reutersга берган изоҳида Россия можарони дипломатик йўл билан ҳал этиш тарафдори эканини билдирган. Бироқ у мамлакат «махсус ҳарбий операция»ни давом эттириш учун етарли имкониятларга эга эканини ҳам таъкидлаган.
Украина Президенти Владимир Зеленский девонидаги юқори лавозимли манбалардан бири эса сўнгги ойларда тўпланган разведка маълумотлари Путиннинг тинчлик музокараларига эмас, аксинча, ҳарбий ҳаракатларни кенгайтиришга тайёрланаётганини кўрсатаётганини айтган.
Унинг сўзларига кўра, Россия нафақат Украина ҳудудида янги ҳарбий операцияларни бошлаши, балки Европа давлатларига нисбатан ҳам босимни кучайтириши эҳтимолдан холи эмас.
Аввалроқ Украина Президенти Владимир Зеленский Россия–Украина урушида ҳал қилувчи босқич энди ҳаво майдонида кечаётганини билдириб, Россия Президенти Владимир Путинга кескин баёнот билан мурожаат қилган эди.
